Shillong, Naitung 05
Ka Mohun Bagan Super Giant FC ka la pynbna ba ka la soi ïa u rangïalehkai na Australia u Tom Aldred na ka bynta ban pynkhreh ïa ka aïom ka ban wan jong ka lympung ïalehkai Indian Super League.
Ka jingwan ïasoh jong une u rangïalehkai shadien (32 snem) kan long ka jingïarap ban nangpynkhlaiñ ïa kane ka kynhun ba khlaiñ bor na Kolkata.
“Nga sngewkmen eh ban pynïasoh sha ka Mohun Bagan Super Giant FC. Ka long ka burom kaba khraw ba ngan ïoh ban phong ïa ka jersey rong jyrngam bad maroon bad nga da thrang eh ban sdang noh ka jingïalehkai,”
Ka jingwan ïasoh une u rangïalehkai ‘dien uba la ju mlien ban ïalehkai ka la long ka jingïarap ban nangpynkhlaiñ ia ka kynhun khamtam ha ka bynta kaba shadien.
“Ka kam ïalehkai ka jong nga ka la pynlong ba ngan poi ïalehkai sha England, Scotland, Australia bad mynta sha India. Nga la khmih lynti ba ha kane ka jingïaid lynti ka jong nga ngan ïaleh ban ïalehkai bha na ka bynta katei ka klob ISL bad khatduh ha ka Asian Champions League bad ban kynjoh sha ka thong.”
Na ka liang u Aldred u la pynpaw ba u tip bha shaphang ki nongkyrshan ba radbah kane ka klob. “Nga la ju tip bha halor ka jingïaid lynti ka Mohun Bagan bad nga la ju peit bha ïa ki jingïalehkai jong kane ka kynhun. Te kumta ngan ïaleh katba lah ban ïalehkai bha na ka bynta ka klob haba nga mihkhmat ia ka Mohun Bagan. Nga khmih lynti ban trei shitom bad ban noh synñiang na ka bynta ka klob, ki paidbah nongkyrshan bad na ka bynta ki para nongïalehkai.”
“Nga sngew lah ban ap na ka bynta ban wan sha India bad ban ïakynduh ïa baroh kiba don ha Kolkata. Shen ngin sa ïakynduh,” la bynrap u Aldred.
Na ka lang u Jose Molina uba long u coach ka Mohun Bagan Super Giant u la ong, “U Tom Aldred u long u rangïalehkai uba tbit bad ka jingwan ïasoh ka jong u kan long ka jingpynkhlaiñ ïa ka kynhun ha ka bynta kaba shadien. Ka jingtbit ka jong u kan long ka jingpynkhlaiñ ïa ka kynhun,” u la bynrap.
