Shillong, Naitung 05
Ka Athletics Federation of India ka la pynban ïa 28 ngut ki nongïalehkai jong ka kynhun ïalehkai ka ri na ka bynta ka Paris Olympics 2024 ha kaba u khlur nongkawang sum bad uba la khur ïa ka takma ksiar, u Neeraj Chopra un ïalam ïa kane ka kynhun bad la khmih lynti ruh uwei u nongïalehkai long jumper u Jeswin Aldrin un shah kynthup lang ha kane ka kynhun.
Utei u khlur ïalehkai ba dang 26 snem ka rta uba la khur ïa ka takma ksiar ha ka Tokyo Games bad uba la bat ïa ka nam lahduh ha ka pyrthie ha ka jingkawang sum, u la rai ban ym ïashim bynta ha ka Diamond League mynta ka taïew ka ban long ha Paris khnang ba u lah ban pynkhreh bha ha katei ka lympung.
Kane ka kynhun kaba kynthup ia 17 ngut ki shynrang bad and 11 ngut ki kynthei lem bad ki nongïalehkai kiba kynsai kum ki lahduh ha ka Asian Games kata u Avinash Sable, Tajinderpal Singh Toor lem abd ka Jyothi Yarraji.
La khmih lynti ba u rangïalehkai long jumper u Jeswin Aldrin un shah kynthup lang hapoh kane ka kynhun hadien ba ka Athletics Federation of India (AFI) kan weng noh ïa u M. Sreeshankar, u bym shym la lah ban kynjoh sha ka thong na ka bynta ban ïoh rung sha ka Olympics na ka daw ka jingmynsaw.
Kumba ka long mynta u Aldrin ka dangsah sa tang sien ban ïoh rung sha kaba u la don ha ka kyrdan ba 33 ha ka kyrdan jong ka World Athletics (WA). Kin don haduh 32 ngut ki nongïalehkai ki ban ïashim bynta ha long jump ki shynrang ha ka Paris Olympics.
“Nga la rai ha ka jingïalang jong ka selection committee kaba la long hynne ka sngi ba uno uano u ban ïoh ïa ka kyrdan kham shakhmat ha ka pyrthei yn kynthup ïa u hapoh ka kynhun ïalehkai ka ri,” la pynpaw u coach jong ka ri u Radhakrishnan Nair.
Kumba ka paw ka Jyothi Yarraji ka la long kaba kynthei kaba nyngkong eh jong ka ri ha ka 100m hurdler ban ïashim bynta ha ka Olympics, katba u nongkawang shot put u Abha Khatua ruh u lah ban thaw rekod lyngba ka ‘world ranking’.
U rangïalehkai high jump u Sarvesh Anil Kushare, uba la khur ïa ka takma ksiar ha ka National Inter-State Championships da kaba tam hduh 2.25m, u la don lang ha kane ka kynhun.
Ki kyrteng ki rangïalehkai ki long u Avinash Sable (3,000m steeplechase), Neeraj Chopra, Kishore Kumar Jena (javelin throw), Tajinderpal Singh Toor (shot put), Praveen Chithravel, Abulla Aboobacker (triple jump), Akshdeep Singh, Vikash Singh, Paramjeet Singh Bisht (20km race walk), Muhammed Anas, Muhammed Ajmal, Amoj Jacob, Santhosh Tamilarasan, Rajesh Ramesh (4x400m relay), Mijo Chacko Kurian (4x400m relay), Suraj Panwar (race walk mixed marathon), Sarvesh Anil Kushare (High Jump).
Ha ka liang ki kynthei ki kynthup ïa ka Kiran Pahal (400m), Parul Chaudhary (3,000m steeplechase and 5,000m), Jyothi Yarraji (100m hurdles), Annu Rani (javelin throw), Abha Khatua (shot put), Jyothika Sri Dandi, Subha Venkatesan, Vithya Ramraj, Poovamma MR (4x400m relay), Prachi (4x400m), Priyanka Goswami (20km race walk/race walk mixed marathon).
