Shillong, Naitung 07
Ka rynsan ban jied ‘thei bhabriew ne ka Miss Meghalaya bad Miss Teen Meghalaya 2024 ka la khring shi kat dei ïa kiba bun ki ‘thei samla, namar ki la don palat 40 ngut kiba wan ban pyrshang sha kane ka rynsan ban jied ïa kiba kynsai tam kaba la long ha Hotel Vivanta Khyndai Lad ha ka 6 tarik Naitung, 2024.
Ka lahduh jong ka Miss Meghalaya 2024 kan ïoh phong ïa ka pansngiat jong ka Miss Universe Meghalaya bad kan ïoh rung beit-beit sha ka rynsan ïakhun jong ka Miss Universe India 2024. Katba kaba wan ba-ar bad balai kan mihkhmat ïa ka jylla ha ka Miss Northeast 2024, ka ban long ha Itanagar, Arunachal Pradesh.
Ha kajuh ka por, ka lahduh jong ka nam Miss Teen Meghalaya 2024 kan ïoh rung beit-beit sha ka jingïakob jong ka Miss Teen Diva 2025, ka ban long ha Jaipur, Rajasthan.
Ka Miss Meghalaya Organisation (MMO) ka la pynthikna ba ki ‘thei samla kiba jop kin ïoh ïa ka rynsan kaba paka ban pyni shuh ïa ka sap ka phong jong ki ha ka rynsan jong ka ri bad ha ki kyrdan bapher-bapher.
Ka Miss Meghalaya ka dei ka rynsan kaba nyngkong ban plie lad ïa ki ‘thei samla ha kane ka jingïakob ban ïoh ïashim bynta ha ka Miss Universe India.
Ka jingïakhun kaba kut jong ka Miss Meghalaya bad Miss Teen Meghalaya 2024 kan long ha LARITI Multipurpose Hall ha ka 3 tarik Nailar 2024.
