Montreal, Naitung:
Ha kane ka khubor, la ong ba kawei ka Balang Katholik na ka thaiñ Mihngi jong ka ri Canada, ka la hap ban pynlut bad siew haduh 104 Million Dollars ($76 million) kum ka bai mynraiñ khmat lane ka bai lut-ksan sha ki spah ngut ki lanot kiba ngat ha ki jingjia kum ka jingshah leh be-ijot bad ki jingshah leh bor na ki phang mihngi jong ka Canada.
Ha u snem 2020, la ong ba ka iingbishar jong ka Canada ka la lap ia ka jingdon kti jong ki nongialam niam ban pynngop bad shim kabu ia ki khynnah- samla bad kitei ki khynnah- ki samla ki ju shah pynbiej bad shah batbor ha kitei ki nongialam niam jong kawei ka jaka ri khunswet bad kane ka la sdang ban jia naduh ki snem 1940 bad ka la bteng bad iaid neh da ki phew snem mynta.
Kumta, la ong ba baroh 292 ngut kitei ki khynnah kynthei kiba shah leh bor ha katei ka jaka, kin ioh ia ka bai lut ksan kaba sdang naduh ka 55 hajar haduh 850 hajar tyngka.
La ong ba dei ka tnat Ernst & Young kaba la buh jingkheiñ- jingdiah bad kaba la shim ia ka jingkit khlieh ban peit thuh bad ban pynioh ia katei ka bai lut ksan sha man kawei pa kawei ka briew kaba ngat ha katei ka lanot ha kitei ki phew snem ba la leit.
U Geoff Budden, uwei na ki nongïasaid aiñ uba mihkhmat ia kitei kiba shah leh bor, u la ong ba kitei ki lanot ki don hok ban ioh ia katei ka bai lut ksan namar ki jingeh kiba bun ba ki hap ban iaid lynti bad kaba ki la dep ban mad ruh ha baroh shi katta ki snem naduh ba ki ngat ha kitei ki jingjia.
Namar utei u nongïasaid aiñ u la ong ba ki briew kim lah ban sngewthuh haduh katno ka jingsngewsih bad jingeh ba kitei ki lanot ki iakynduh haba ki mad ia kum kitei ki jingjia bad ki hap ban kit ia kitei ki jingkhuslai bad jingsngewsih baroh shi jingim namar kaei kaba la jia ia ki ha ki por ba la leit, ka la shon shap hapoh ka dohnud jong ki bad ym don lad shuh da kumwei pat lait na kaba ai jingiarap bad kyrshan ia ka jingim jongki khnang ba kin lah ban ieng ha la ki jong ki kjat wat lada ymdon ba iarap ne haba shah leh ibeiñ ha kiwei pat.
Kumta, u Budden u la ong ba u kyrmen skhem ba kitei ki lanot baroh kin ioh ia ka bai lutksan kumba la dep pynbna bad bthah da ka iingbishar ha ki tnat ba dei khmih halor katei ka jingiarap kaba ki dei hok ban ioh namar ka jingshah shim kabu jong ki ha kitei ki por ba la leit.
