Nongstoiñ, Naitung 07
Ka jingban jong ka jingshitom ïa ka kmie bad u kpa ka ïing mynta la katto-katne bnai ka la pynlong ïa kawei ka longïing kaba don ha ka shnong Riangpoit, West Khasi Hills ban mad ïa ka jingeh, ha kaba tang ban ïoh ïa ka bam ka dih ruh ka la long kaba eh haduh katta-katta.
Ïa kane ka pyntikna da ka Federation of Khasi Jaiñtia & Garo People (FKJGP), Riangpoit Unit hapoh ka jingïalam jong u President, Bah Pius Puweiñ bad u samla Shanbor Nongsiang, Vice-President ka Circle ha ryngkat ka jingsynran lang ki nongkitkam ka FKJGP Maweit Circle ha ka 6 tarik mynta u bnai ki la ïoh ban leit jngoh ban ai mynsiem bad kner jingïarap sha katei ka longïing.
Ki nongkitkam ka FKJGP Riangpoit ki la ïathuh ba kane ka longïing ka dei jong u Bah Seles Marshra bad ka Kong Aimon Sohphoh na ka shnong Riangpoit hi kiba don ruh 5 ngut ki khun bad kiba don hapdeng ka jingshitom baroh 2 ngut shi lok mynta la palat 6 bnai tam eiei bad ki la shym jynjar haduh katta-katta wat ïa ka bam ka dih ki shu ap na ki bahaïing ha sem ryngkat ki para marjan.
“Kum ka seng hi ngim lah ban shu peit da ki khmat hynrei da i bor barit kum ka seng da ka jingïatreilang ki dkhot baroh ngi la lah ban ïa lum ïa lang bad mynta ka sngi ngi la ïoh ban pyndep ïa kane ka kam ban noh bad kner ka jingïarap ha i bor barit eh,” la ong ki nongkitkam ka FKJGP.
