Guwahati, Naitung:
Ka jingshlei um kaba shyrkhei ha Assam kaba la neh naduh mynshem bnai ka la shim ïa ka jingim jong 52 ngut ki briew, nalor kane ka la wanrah ruh ïa kiba bun ki jingjulor kiba kynthup ïa ki jingtei, ki surok, ki jingthung jingtep, ki jingri bad kiba bun kiwei pat ki jingdon jingem. Kane ka jingshlei um ka la pynduh jaka sah ruh ïa ki hajar ngut ki briew. Ki la don kumba 100 tylli ki longïing ha ka thaiñ Rowmari Pathar kiba la ïohmad kum ïa kine ki jingeh, ha kaba ki la duhnoh ïa ki ïing jong ki na ka jingtwa khyndew ha ka wah Brahmaputra ha kine ki shibnai, arbnai ba la leit, la ïathuh ka tyllong khubor.
“Hapoh ka shi bnai ne ar bnai, ki la don kumba 100 tylli ki longïing kiba la duhnoh ïa ki ïingsah jong ki bad mynta kine ki la sah ha ki jaka sah ba shipor ne ha kiwei pat ki jaka kiba lait na ka jingshah ktah ha ka jingshlei um. Kumba la sakhi, la ong ba ka la don ka ïew kaba heh bha ha kane ka thaiñ hynrei mynta kane ka la don ha marpdeng jong ka wah Brahmaputra. Kane ka wah ka la rong noh ïa kumba 50 tylli kiwei pat ki ïing ha ki ar snem ba la leit. Lada ka jingtwa khyndew kan ïai bteng, ka shnong jong ngi kan sa sah ha ka khana pateng ha ki ar ne lai snem ban wan,”la ong uwei na ki nongshong shong uba la ïohmad ïa ki jingeh na ka jingshlei um.
Ha kaba ïadei bad kane, na ka liang ki nongshong shnong ki la buh ka jingkyrpad na ka sorakar ba ka la dei ban leh katba lah ban ïada ïa kane ka thaiñ. Kiba bun ki ïing ki la shah pynjulor na ka jingshlei um ha une u snem bad ki la ong ba lada ka sorkar kam lah ban leh ei ei ha kane ka por, ki nongshong shnong baroh kin sa ïakynduh ïa ka jingeh kaba khraw. Ka jingtwa khyndew namar ka jingshlei um ka la rong noh ïa kiba bun ki shnong. Kumba la sakhi, ka thaiñ Rowmari Pathar kaba don ïa kumba 500 tylli ki longïing, ka la shah ktah jur naba kiba bun ki nongshong shnong ki la duhnoh ïa ki jaka bad ki ïing na ka jingtwa khyndew bad ka jingshlei um.
Ki la don kumba 100-150 tylli ki ïing kiba la shah pynjulor ha ka por ba la jia ka jingshlei um, bad kiba bun na kine ki ïing ki dei ha kane ka shnong. Kumba la ïathuh ka tyllong khubor, la ong ba baroh ar, kata ka jingtwa jong ki rud wah bad ka jingshlei um ki la long ki daw ba wanrah jingeh ïa ki nongshong shnong ha Barpeta distrik. Ka jingshlei um kaba mynta ka la ktah lajan 140,000 ngut ki briew bad tap ïa kumba 179 tylli ki shnong kiba don ha ka distrik.
Haduh mynta ki la jandon 2.42 Million ngut ki briew kiba la shah ktah jur na ka jingshlei um ha baroh 30 tylli ki distrik kiba don ha ka jylla. Ka jingshlei jong ka wah Brahmaputra ka la tam ïa u dak ba don jingma bad kane ka la long ha ki bynta jong ka Neamatighat, Guwahati, Goalpara, bad Dhubri. Cachar, Kamrup, Hailakandi, Hojai, Dhubri, Nagaon, Morigaon, Goalpara, Dibrugarh, Nalbari, Dhemaji, Bongaigaon, Lakhimpur, Jorhat, Sonitpur, Kokrajhar, Karimganj, South Salmara, Tinsukia, Charaideo, Barpeta, Karbi Anglong, Golaghat, Sivasagar, Chirang, Majuli, Biswanath, Darrang, Karbi Anglong West, bad Kamrup Metropolitan kine ruh ki la shah ktah na ka jingshlei um, la ïathuh ka tyllong khubor.
