Nongstoiñ, Naitung 07
Na ka bynta ban pynbha ïa ki jingtreikam ka tnad ka koit ka khiah hapoh West Khasi Hills District, ka Khasi Students’ Union (KSU), West Khasi Hills District, ka la leit ban ïakynduh ïa ka Myntri ka tnad ka koit ka khiah, ka Dr. Mazel Ampareen Lyngdoh ha ryngkat ka shithi ba ka Seng ka la buh ruh ïa ki bun tylli ki mat jingdawa.
Katkum ka dorkhas ïa kaba ka KSU ka la aiti sha ka Myntri ba dei peit, la pynpaw ba ka KSU ka la ban jur ïa ka jingdonkam ban weng ïa ka jingduna nongtrei, da kaba kynnoh ba ki don palat 30 tylli ki kam kiba lait ha kylleng ki jaka sumar bad kane ka jingduna briew ka wanrah ïa ka jingbym biang ka jingshakri bad ka jingeh ïa ki nongshong shnong, kumta ki la kyntu ïa ka Myntri ban shimkhia mardor ban pyndap ïa kine ki kam ba lait.
Ka jinglong khuid ha ka jingpynrung kam ka long kawei pat ka jingeh kaba khraw kaba la pynpaw da ka Seng da kaba ki la pynpaw ïa ka jingsngewkhia halor ka jingkynnoh ba la thung kam shadien bad ka jingbym don ki rukom jied kiba hok. Ha ka shithi, ka Seng ka la dawa ban pynpaw paidbah ïa ki kam ba lait bad ka rukom thung kam kaba lait na ka jingktah jong ka saiñ pyrthei bad nalor kata, ki la kyrpad ban tohkit bniah ïa ki jingbym hok ba la dep bad ka jingkitkhlieh na ka bynta kito kiba donkti.
Ka jingsdang jong ka jaka sumar khyllung kaba don 50 jingthiah ha Nongstoiñ kaba la ap slem bha ka la long sa kawei pat ka mat kaba kyrkieh kaba la wanrah da ka Seng ha kaba ki la pynpaw ïa ka jingkordor jong kane ka jaka na ka bynta ki longkmie bad ki khynnah ha kane ka thaiñ bad ki la kyntu ïa ka Myntri ban buh hakhmat eh ban ïoh plie noh ia katei Maternity & Child Hospital.
Ka jingpynbha ïa ki lad jingsumar ruh ka la long ka jingdawa kaba kongsan ha katei ka shithi bad la ban jur halor ka jingdonkam ban kyntiew kyrdan ïa ka Maweit Public Health Centre (PHC) sha ka Community Health Centre (CHC) namar ka jingbun briew kaba ka shakri, nalor kata, ki la kyrpad ruh ban kyntiew noh kloi ïa ka Nongkynjang Sub-Centre sha ka PHC, ka projek kaba la dep mang pisa bad buh mawnongrim hynrei ka dang sahteng sah haduh mynta.
