Shillong, Naitung 07
Ka India ka la lah ban pynliem noh ïa ka Zimbabwe da 100 run ha ka jingïalehkai T20I kaba ar kaba la long ha ka Sngi U Blei. Lyngba kane ka jingjop, ka India ka la lah ban pynïakhaid da mar kawei ka jingjop.
Kane ka jinglah ka India ban ïoh ïa kane ka jingjop kaba heh ka la wan ruh lyngba ka jinglah jong u Abhishek Sharma ban tied ïa ka spah run kaba nyngkong eh ha ka jingïalehkai T20 na ka bynta ka India.
Haba phai sha ka jingïaleh-kai, ka India kaba la tied nyngkong ka la kamai haduh 234 run na ki 20 over bad hap tang 2 wiket. U Abhishek u la tied 100 run na 47 bol, u Ruturaj Gaikwad u la tied 77 run na 47 bol bad u Rinku Singh u la tied 48 run na 22 bol.
Haba wan beh ïa kane ka thong kaba heh, ki nongtied ka Zimbabwe kim shym la lah satia ban shan hakhmat ki nongkawang bol ka India namar ki la lah ban kamai tang 134 run na ki 18.4 over bad hap lut baroh ki wiket.
Na liang ki nongtied ka Zimbabwe, dei tang u Wesley Madhevere uba la tied 43 run na 39 bol, u Luke Jongwe u la tied 33 run na 26 bol bad u Brian Bennett u la tied 26 run na 9 bol. Ki nongkawang bol ka India kiba la ïalehkai bha ki long u Avesh Khan uba la ïoh 3 wiket bad ai 15 run na 3 tylli ki over, u Mukesh Kumar u la shim 3 wiket bad ai 37 run na 3.4 over bad u Ravi Bishnoi u la shim 2 wiket bad ai 11 run na 4 over.
