Shillong, Naitung 07
Ka Hima Sohra ka la ai por ïa ka Khasi Hills Autonomous District Council (KHADC) haduh ka 9 tarik u Naitung, 2024 ban weng noh ïa ka hukum ba la pynmih ha ka 24 tarik Jylliew kaba pynbna ïa ka Majai kum ka Raid.
Haba kren sha ki lad pathai khubor ha ka Sngi Saitjaiñ, u Syiem ka Hima Sohra, u Pa’iem Freeman Sing Syiem, u la ong ba ma u lem bad ka Dorbar ki pyrshah jur ïa katei ka hukum jong ka KHADC.
U Pa’iem u la ong ba ka Executive Committee jong ka KHADC ka la phah ïa u ban jubab halor ka jingujor na u General Secretary ka Dorbar Shnong ka Majai, da kaba kynnoh ba u la ai ïa ki kot jaka sha ki bym dei trai-ri bad thung ruh ïa u ‘Chairman’ ha kata ka shnong.
U Pa’iem u la ong ba ka KHADC ka la ai por tang 3 sngi ïa u ban jubab halor ka jingujor na ka Dorbar Shnong Majai.
Katkum ka jingïathuh jong u, ïa ka jingujor la phah sha ka KHADC ha ka 30 tarik Jymmang bad u Syiem ka Hima Sohra u la ïoh pdiang ïa ka ‘Show Cause’ ha ka 31 tarik Jymmang bad u hap ban jubab hapoh ka 3 tarik Jylliew.
U Pa’iem u la ong ba namar ka jinglyngkot ka por, u la thoh sha ka KHADC ban ai por ïa u ban jubab halor ka jingujor da ka Dorbar Shnong ka Majai, hynrei ha ka 24 tarik Jylliew, ka la mih pynban ka jingpynbna ban ithuh noh ïa ka Majai kum ka Raid.
U Pa’iem Freeman u la kdew ba ha ka jingujor na u General Secretary ka Dorbar Shnong Majai, la bsut lang ïa ka ‘Letter Head’ kaba ai syrnot ‘Residential Certificate’ da u Rangbah Shnong ka Majai, hynrei katkum ka jingïathuh u Syiem ka Hima Sohra, ym don Rangbah Shnong ha kata ka shnong hynrei tang u Chairman.
Haba kylli la u Chairman u la pyndonkam bakla ïa ka kyrteng Rangbah Shnong, u Pa’iem u la ong ba u don u ‘Acting Sordar’ ha Majai u ban khmih ba ym don mano-mano uba pyndonkam bakla ïa ka kyrteng ‘Chairman’ ne Rangbah Shnong.
Na ka liang u Pa’iem u la ong ruh ba u Chief Executive Member (CEM) ka KHADC, Bah Pynïaid Sing Syiem u la phah wan ïa u sha ka jingïalang ha ka 11 tarik Jylliew bad ha katei ka jingïalang u la phah ïa u Pa’iem ban weng noh ïa u Bah B.V. Rymmai kum u Secretary ka Hima Sohra.
Hynrei u Pa’iem u la kyntait ïa kane bad ong ba ka dei ka kamram jong ka Executive Dorbar ban leh ïa kane.
Hadien kane, u Syiem ka Hima Sohra u la lum jingïalang jong ka Executive Dorbar ha kaba ka jingbthah jong u CEM ka la shah kyntait naba ym don daw eiei ban weng ïa u Bah Rymmai.
Shuh shuh u la bynrap ba ka rai ban ithuh ïa ka Majai kum ka Raid la leh khlem ka jingmynjur jong ka ophis u Syiem of Hima Sohra bad kumta ka Executive Dorbar ka kyntait ïa katei ka jingpynbna.
