Shillong, Naitung 07
Ka North East Zone Cultural Centre, Dimapur, Nagaland, Ministry of Culture ka Sorkar Pdeng ka la jied ïa u Bah Majibur Khongjirem na ka shnong Wahkhen ban long u Guru hapoh ka Guru Shishya Parampara Scheme na ka bynta shisnem naduh u Jylliew, 2024 haduh u Jymmang, 2025 halor ka phang ban hikai ïa ki khynnah kumno ban shna ïa ka Tangmuri kaba dei kawei na ki jingput tynrai u Khasi.
U Bah Majibur Khongjirem u dei u pyrsa trai jong u Bah Komik Khongjirem (National Awardee) na shnong Wahkhen. U long u briew uba ieid bha ïa ka put ka tem, ka shad ka kmen bad ka rwai ka siaw bad u dei ruh uwei u nongshna tangmuri ba paw jong ka thaiñ Riwar Pynursla.
U Bah Majibur Khongjirem u dei u Nongbat Sla Nongbat Lyngdoh hapoh ka Raid Wahkhen, Khyrim Syiemship bad u dei ruh u Duhalia jong ka shad bad lehniam ka Hima Khyrim.
Lah ban pynkynmaw ba ha 29 tarik u Jylliew, 2024, u Pa’iem khynnah ka Hima Khyrim, Pa’iem Habapan Sing Syiem u la wan ban sakhi bad plie ïa kane ka Guru Shishya Parampara Scheme ha ka shnong Wahkhen ha ka jingdon ryngkat lang u Sordar ka Raid Wahkhen Bah Jansing Tynsong, ki Rangbah Shnong, Bah Komik Khongjirem (National Awardee), Sordar barim bad Rangbah Duhalia Bah Skhembor Khongjirem bad ki bahaïing bahasem jong u Bah Majibur Khongjirem.
Ha katei ka sngi, u Pa’iem u la ai ka kyrkhu kyrdoh bad ka kitbok kitrwiang ïa u Bah Majibur Khongjirem ban nang ïoh ka met ka phad kaba koit kaba khiah khnang ban nang lah shuh shuh ban sei ïa ka sap ka ban pynmyntoi ym tang ïa ka shnong ka thaw bad ka Raid, hynrei ïa ka Hima bad ka jaitbynriew Khasi baroh kawei.
