Shillong, Naitung 07
U President jong ka Meghalaya Pradesh Congress Committee (MPCC), Bah Vincent H. Pala u la ong ba ka bamsap bad u drok ki long ki daw kiba hakhmat eh kiba pynsniew dur ïa ka shong suk shong shngaiñ jong ka Jylla.
“Ka jingshong suk shong shngaiñ…nga sngew ba ka dei kaba sniew tam ha ka khana ka ban sah kynmaw jong ka Jylla,” la ong u Bah Pala haba kren sha ki lad pathai khubor ha ka Sngi Saitjaiñ.
U la ong ruh, “Myn-shuwa ka don ka jingeh haba ïadei bad ki kam lehnoh bad mynta kum ban shu ai nuksa, hajan shnong jong nga, saw ngut ki briew ki la shah pynïap.”
U President u la ong ba haba pyrshang kylli na ki briew balei kine ki jingjia ki wan jia? La shem ba kine ki wan jia khamtam namar ka bamsap, u drok kiba la pynsniew shikatdei ïa ka Jylla – ha kawei ka liang, kam dei kaba suk ban pynbha ïa kane.
“Namarkata ka don ka jingkut lad ha ki briew bad kane ka dei ka jingsdang…phi ïohi, kane ka jia na ka por sha ka por,” u la ong. U Bah Pala haba pynkynmaw ïa kito ki por ba ka Congress ka dang don ha ka bor, u la ong ba ki paidbah ki la pynpaw ba ka Congress kam long kaba biang bad kumta kin kynriah noh shawei.
“Hadien pat kin sa sngewthuh ba ka Congress ka dei kaba biang eh. Hangne ruh, haba ngi dang don ha ka bor, hooid ki Myntri, nongïalam jong ngi ki lah ban sarong, bad kumta ki paidbah ki la ieh ïa ngi,” u la ong.
Ha kawei ka liang, u la pynsngew ba ka long ka kabu kaba biang eh ïa ki paidbah ban mad ïa kiwei pat ki seng, bad kaei kaba ka Congress ka lah ban ïohi ka long ba ka seng ka pyrshang ban khmih bniah bad pynbit-pynbiang ïalade.
“Ka bha ba ngi rem teng-teng, bad hooid, ngin pynkhie im biang bad lyngba ka jingrem, ngi dei ruh ban kham pynbha shuh-shuh ïalade,” la ong utei u nongïalam ka MPCC. Shuh shuh haba ban biang halor ka mat ba ïadei bad ka shong suk shong shngaiñ, u Bah Pala u la bynrap, “U drok, ka khaïi met…dang shen nga la don ka jingïalang…phi tip bun na ki samla jong ngi ki la shah phah shabar bad khlem ka jingtip jong ki, la pynkylla ïa ki ‘passport’ bad shibun kiei-kiei. Ki don shibun kiei-kiei kiba phim ïohi kumno ki briew ki shah pyndonkam bakla ha ka kyrteng jong ka ïoh kam ïoh jam bad kiwei-kiwei.”
Na ka liang u President ka MPCC u la kubur ba ki paidbah ki la ngiah ïa ka Sorkar ba mynta.
