Shillong, Naitung 07
Ka England bad Netherlands mynta kin pynkhreh ban ïakhun pyrshah ïa ka semi-final na ka bynta ban ïaknieh rung sha ka final jong ka lympung Euro 2024 kaba dang ïaid mynta ha Germany.
Ka jingïoh rung jong ka England sha ka semi-final ka la wan hadien ba ka la lah ban pynliem noh ïa ka Switzerland lyngba ka jingïashut tie-breaker ha ka jingïakhun quarter-final kaba la long ha Dusseldorf ha Germany.
Ha kane ka jingïashut tie-breaker, ka England ka la pynliem noh da 5-3 kol ïa ka Switzerland, kaba la wan hadien ba u nongap kol ka England u Jordan Pickford u la lah ban kyrda ïa ka bol ba la shut da u Manuel Akanji, katba baroh 5 ngut ki rangïalehkai ka England kiba la wan shakhmat ban shut, ki la lah ban pynkhih jar lut.
Hashwa kane haba phai sha ka jingïalehkai, ka jingïakhun hi kam shym da long satia kaba itynnad haduh katta katta hynrei dei ha ka minit kaba 75 ba u Breel Embolo u la pynkhih jar nyngkong na ka bynta ka Switzerland. I kumba ka England kan hap song noh ïa ki tum ki tam, hynrei tang hadien 5 minit u Bukayo Saka u la lah ban pynïakhaid ïa kane ka kol bad kaba la ai mynsiem pat ïa ki rangïalehkai ka England.
Kumta hadien ba la ïakhaid da mar shi kol, haba bteng ïa ka jingïakhun ha ka extra time ruh ym shym la don kiba ïoh jingjop bad kumta la hap ban rai noh sha ka tie-breaker.
Lyngba kane ka jingjop, ka England mynta kan pynkhreh pat ïa ka semi-final pyrshah ïa ka Netherlands ka ban long ha ka sngi Balang ha Dortmund. Kan dei ruh ka sien ba nyngkong ba kine ar tylli ki ri kin ïakynduh pyrshah ha ki lympung kiba heh kata naduh ba ki la ïakynduh teng ha ka Euro 96 jong ka group stage.
Haba phai pat sha ka jingïakhun quarter-final hapdeng ka Netherlands pyrshah ïa ka Turkey, ka la long ka jingïalehkai kaba itynnad bad kaba la pynhun mynsiem shi kat dei ïa ki nongkyrshan.
Ha ka kylla step, ka Turkey ka la ïoh ban khyrwit ïa ka kol kaba nyngkong lyngba u Samet Akaydin kaba la pynlong ïa ka jing-lehkmen kaba jam bha khamtam na ki nongkyrshan.
Hynrei kane ka jingleh kmen kam shym la neh slem bad dei ha ka kylla miet ba u Stefan de Vrij u la ïoh ban pynïakhaid ïa kane ka shi kol. Tang hadien katto katne ka minit, ka Turkey ka la ïoh biang ka kabu ban pyntam kol hynrei ka bol ba la shut free kick ka la leit dei beit-beit u diengkol.
Katba ka jingïalehkai ka dang ïaid, ka jingïakhun tyngeh na u Cody Gakpo, ka la wanlam sha ka jingïoh ïa ka kol kaba ar, hadien ba u Mert Muldur u la kum thep bakla sha ka kol la jong kaba la pynlong pat ïa ka Netherlands ban tam da 2-1 kol bad kaba la biang pura ruh ban jop syndon ïa kane ka jingïalehkai.
La khmih lynti ba ka jingïakhun hapdeng jong ka England pyrshah ïa ka Netherlands kan long kaba itynnad bad ka ban pynhun ïa ki nongkyrshan. Kiba jop na kane ka jingïakhun kan hap ban pynkhreh pat ban ïakhun final pyrshah ïa ka nongjop na ka jingïakhun hapdeng ka Spain pyrshah ïa ka France ha kawei pat ka semi-final.
