Ki nongtrei ka Enforcement jong ka tnat Transport ka sorkar jylla ha ka Sngi Saitjaiñ ki la mih sha surok ban khynra pyrshah ïa kito ki ar shaka kiba kamai be-aiñ, bad ka la mih ruh ka thma ktien. Ka long ka jingshisha ba ki ar shaka ki la mih kum ki tit ban kamai ha kylleng ka sor Shillong, bad don ki nongkamai kiba ka rukom oh dor kam ïahap shuh bad ka jingjan ne jingjngai jong ki jaka kiba ki nongleit nongwan ki donkam ban phah leit buh. Ha Motphran, ngi ïohi khrui ki nongkamai ar shaka kiba ïaknieh ïa ki nongleit nongwan. Nalor kine, don sa ki kali saw shaka kiba kamai bad kiba la biang ïa ki kot ki sla bad kiba siew khajna ruh sha ka sorkar. Ha Khyndailad ruh ka long kumjuh ka jingkharoi jong ki ar shaka kiba kamai. Hangne, ngim ïakren shaphang kita kiba kamai katkum ki kyndon aiñ bad kiba da siew khajna sha ka sorkar.
Ïa ki nongleit nongwan, ka jynjar ban ithuh mano ba dei ki nongkamai bad mano ki bym dei namar kim don ka jingpynïapher. La shu long paidbah beit salonsar. Don ruh ki nongkamai ki bym tip bha ïa ki shnong ki thaw bad ki dong kiba don ha Shillong, bad namarkata, ïa ka dor ruh ki la shu shim antad, teng-teng ka poi shaduh ki spah tyngka ka bym ïahap shuh haei-haei. Mynta, ki la don ki nongtyrwa ban leit buh bad ym ka jingkyrpad na ki nongphah leit buh. Kane ka jia long namar ka jingbun ki nongkamai. Lada shong ha ki kali saw shaka kiba kamai, ngi ju ïohsngew ïa ka jingshah khñium ki nongkamai ar shaka – naduh ka jingkamai be-aiñ bad haduh ka jingtur laplah khlem da peit sha kamon sha kadiang ne shakhmat bad shadien kaba buh jingma ïa ki nongshong ïa kito ki ar shaka bad kiwei pat ki nongleit nongwan.
Hynrei, hapdeng kane ka jingïatai halor ka jingkamai be-aiñ, kawei na ki daw ba mih ki nongkamai ar shaka kumba mih ki tit khlaw ka long ka jingkyrduh kam bad ka jingdonkam ban kamai jakpoh. Ki don napdeng ki nongkamai kiba dei artad ki samla kiba dang don hapdeng ka jingpule. Lehse ka jingmih shakhmat ban kamai ka long ban pyndap ïa ka bai pule jong ki bad kim kwah ban shu pan than na ïing na sem. Ym dei ba baroh kiba kamai ar shaka ki long ki briew ki bym don jingkitkhlieh. Ki don bun kiba ñiah jai-jai khlem da buh jingma ïa ki nongshong bad ki nongleit nongwan. Hynrei watla katta ruh, ki sah hi ki nongkamai be-aiñ, bad ym lah ban pynksan da kumwei pat.
Hangne kan hap wan ka rukom pyrkhat bathymmai ha ka sorkar bad ka tnat Transport. Dei ban plie lad ïa kine ki nongkamai hadien ba ki la pynrung kyrteng ïalade, ki la ïoh laisen, siew khajna bad kiwei ki jingdonkam. Ym dei ban shu ailad pathar, hynrei dei ban buh da ki kyndon. Ka dei ban don ka rukom kamai kaba beit bad kaba yn ym buh jingma hadien habud. Ka jingbym don ki rong ki rup bakyrpang ha kito ki ar shaka ba kamai, jingbym don ki jingda khlieh kiba biang, jingbym don jaka ba biang ban pynïeng ïa ki ar shaka haduh ba la shu ïa buh kat shaba lap ba shem bad kiwei-kiwei ki dei ban jah noh. Baroh ki nongshong shnong ki don ïa ka hok ban kamai jakpoh, hynrei ka dei ban long Katkum ka lynti bad ki aiñ. Lada ailad ïa baroh ban kamai kat kaba ki sngewbit khlem da donkam ban siew khajna lane pynrung kyrteng bad ka sorkar bad kumta ter-ter, kaei ka ban jia?
Namarkata, donkam ka jingïakren kaba sani bad baroh ki mamla ha kane ka kam kamai. Ka sorkar kam lah ban khanglad ïa ki nongshong shnong ba kin kamai, hynrei ka dei ka kamram jong ka sorkar ban buh ïa ki kyndon kiba biang khnang ba ka kam kan ïaid beit ïaid ryntih bad ym shuh kumba ka long mynta. Ki nongkamai ruh ki dei ban sngewthuh ba kim lah ban shu leh katba ki sngewbit. Haba ki pyndonkam ïa ki surok ba kin ïaid kin ïeng ban kamai, ki dei ruh ban siew khajna lym kumta ka sorkar kan ïoh pisa naei ban maramot lada ki surok ki la julor? Ngim lah ban shu leh katba ngi mon tang namar ngi don ïa ka ar shaka ha phyllaw ïing. Hap ban ïa pyrkhat jngai bad na ka bynta ka jingbha lang jong baroh.
