Nongpoh, Naitung 07
Ar ngut ki rangbah ki la duh noh la ka jingim ha ka step phyrngab jong ka Sngi U Blei hadien ka jingshah tynrah jong kawei ka puh-shilum (JCB) kaba la pynïeng harud jong ka surok Shillong-Bypass kaba dang hap ha ki thaiñ Khapmara jong ka Ri-Bhoi District.
Katkum ka tyllong khubor kaba la ïoh lum na ki pulit, la ïathuh ba uwei na kitei ki rangbah uba ngat ha katei ka jingjia, u dei u nongñiah jong kawei ka puh-shilum ïa uba la tip kyrteng kum u Batilem Suting (28 snem ka rta), na ka shnong Langkyrdem, East Khasi Hills District, katba uwei pat u dei uba la tip kyrteng kum u Slibor Kharbani (25 snem ka rta) na ka shnong Nongdom Umiap, West Khasi Hills District.
La ïathuh ruh ba kane ka jingjia, ka la jia ha ka por kumba 3:30 baje mynstep ha kaba kawei ka trok kaba don ïa u nombor BR-06-GE-5655 kaba kiew na nongbah Guwahati ban leit sha Lad Rymbai jong ka East Jaiñtia Hills District ynda poi ha kitei ki bynta jong ka Khapmara, ka la leit ban tynrah ïa katei ka puh-shilum kaba don ïa u nombor ML-05-W-1708.
La ïathuh ba ha katei ka jingjia, kitei 2 ngut ki la mynsaw jur bad la pynkit noh ïa ki sha Bhoirymbong CHC na ka bynta ban ïoh ïa ka jingsumar kaba kyrkieh. Hynrei namar ka jingjur palat jong ka jingmynsaw kitei baroh 2 ngut rangbah ki khlad noh ha katei ka jaka ai jingsumar.
Shuh shuh, la ïathuh ba u nongñiah jong katei ka trok tang mar ïa dep tynrah, u phet krad noh ïalade na katei ka jaka. Na ka liang ki bor pulit ki dang pynlong ka jingthwet bad jingtohkit kaba jur ban lapdien ïa utei u nongñiah. La ïathuh ruh ba ki pulit ki la rah noh ïa katei ka trok bad ka puh-shilum na ka bynta ban pynlong ïa ka jingtohkit kaba bniah.
