Shillong, Naitung 07
Ka Khasi Students’ Union (KSU) Mawlai Circle ha ka Sngi Saitjaiñ ka la leit ban ai khublei bad kitbok kitrwiang ïa u samla Manbhakupar Malngiang uba la shah jied ban mihkhmat ïa ka India ha ka lympung Under-17 jong ka South Asian Football Federation (SAFF) Men Championship ka ban long ha Thailand.
Ka Khasi Students’ Union, Mawlai Circle ha kane ka sngi hapoh ka jingïalam jong u samla Badon Malngiang, Sports Secretary ka Circle ka la ïoh ban kitbok kitwriang ïa u samla Manbhakupar Malngiang uba la pynkhreh ban leit kilan met sha Srinagar na ka bynta katei ka lympung Under-17 jong ka lympung SAFF Men Championship.
Ha kane ka sngi ka seng ka la ïoh ban leit ai mynsiem bad kitbok kitwriang ïa une u samla hapoh ka ïing sah ka jong u, ha kaba na ka liang ka seng ka la pynpaw ruh ïa ka jingsngewkmen ban ïohi ba napdeng ka thup ki 31 ngut ki ban ïoh leit pyntbit ïalade na ka bynta ka jingpynkhreh ïa katei ka lympung ïakhun, la sakhi ba 2 ngut ki samla Khasi ki la rung hapoh ka thup jong ki 31 ngut. Lyngba kane, ka seng ka sngew dei eh ban kitbok ïa une u samla bad ha ryngkat ka jingkyntu bad jingkyrmen skhem ba une u samla un nang ïai kiew nang ïai trei shitom bad kumjuh ban ïai kiew shakhmat ha ka sap kaba u don.
Ha kawei pat ka liang, ka Seng Samla Mawlai Pyllun (SSMP) ruh ka la ïoh ban leit ai kitbok kitrwiang bad ai mynsiem ryngkat u synñiang ïa u samla Manbhakupar Malngiang uba na ka shnong Nonglum Traisiej, ha shwa ba un mih noh na la ïing, uba la ïoh ban mihkhmat ïa ka Ri India ha ka kynhun ïalehkai phutol U-17 ka ban long ha Bhutan ( SAAF Game) bad Asia Cup ha Thailand mynta u snem.
Ka Seng Samla Mawlai Pyllun ka la pynpaw ba kane ka long ka jingsarong ym tang ïa ka kur Malngiang bad ka shnong Mawlai hynrei ïa ka Jylla Meghalaya bad ka jaidbynriew hynñiewtrep hi baroh kawei.
