Shillong, Naitung 07
Ka jingshna ïa kawei ka projek ha Lachumier kaba la sahteng bad khlem pat lah ban pyndep haduh mynta ka la nang buh jingeh ïa ki paidbah ha ka leit ka wan.
Kane ka projek kaba la shna da ka nala kaba heh bad tap da ka dewbilat, ka dei kawei na ki projek kaba la kynthup hapoh ka Smart City bad ïa kane ka projek la tip kum ka ‘smart road.’
Mynshwa, kane ka jaka ka dei kaba don ka surok rong, hynrei la pynduh noh ïa ka surok da kaba tih ïa ka nala kaba heh kaba sdang nakhmat ka shlem treikam ka Meghalaya Public Service Commission (MPSC) bad shadien ka skul All Saints.
Ka jingsahteng kane ka projek ka la buh jingeh shisha ïa ka leit ka wan ki paidbah khamtam namarba kane ka surok ka dei kaba ju pyndonkam bha da ki nongleit buh skul bad nongshaw skul ïa ki khynnah kiba pule ha skul All Saints.
Wat haba la dep tap da ka dewbilat baroh shilynter ba kan long kum ka surok ïaid kali, pynban ynda la poi ha ka bynta ban ïakynduh bad ka surok hakhmat ophis ka tnat Forest (Sylvan House), kane ka surok ka la sahteng noh kumto, bad ym i don satia ka lynti shano yn pynïaid ïa ka um kaba tuid.
Ïa kane ka bynta la shu ker shipor bad ha ka por ba jur u slap, ka um na kane nala ka tuid kulmar ha Lachumier bad pynlong ïa ka surok ha kane ka jaka ban shlei um.
Ki nongleit nongwan bad kiba leit trei ki la pynpaw ba ki mad jingeh shisha namar kane ka projek ym shym la lah ban pyndep kloi bad ka la long shisha ka jingeh ïa ki paidbah nongïaid lynti bad ki khynnah skul.
Haduh mynta, ym pat ïohi dak ba kane ka projek kan dep kloi namar tang ka jaka ban pyntuid ïa ka um ruh ym pat shna bad ym tip shano ka um kan tuid.
