Ampati, Naitung 07
U Myntri Rangbah ka Jylla, u Conrad K. Sangma u la leit jngoh ïa ka Okkapara bad Mellim hapoh Rerapara C&RD Block, South West Garo Hills ha ka Sngi Saitjaiñ ban shimkhia halor ki jingeh ba ïakynduh da ki nongshong shnong ka thaiñ haba ïadei bad ka jingsniew ka surok Da-malgre-Mellim-Bol-damgre (DMB), ka jingbym biang ka umbam-umdih, bording nalor kiwei-kiwei.
Ha ka jingïalang paid -bah kaba la long ha Okkapara Songma, u Myntri Rangbah, uba la leit jngoh ha ka sien banyngkong ïa ka thaiñ Okkapara-Mellim, u la lap ïa ka jingsniew jong ka surok bad mar-mar u la mang T. 8 klur ban shna kyrkieh ïa ka surok DMB.
U la ong ruh ba ka kam kan sdang noh kloi bad tad haduh kata ka por, u la bthah ïa ki ophisar ka tnad PWD la kumno-kumno ban sdang noh ïa ka jingpynbeit ryntih ïa ka surok khnang ban pynsuk ïa ka ïaid ka ïeng jong ki paidbah ka thaiñ.
Ïa u Myntri Rangbah, la synran lang da u Chairman ka TMB, J.D. Shira, South West Garo Hills DC, Hema Nayak, SP, Vikash Kumar, BDO Rerapara, A.Ch. Momin bad kiwei-kiwei.
Na ka liang u Secretary Shnong, u Maxstone R. Marak u la pynsngew sha u Myntri Rangbah haba ïadei bad baroh ki jingeh kiba ktah ïa ki briew jong ka thaiñ.
Haba ïakren bad sngap ïa ki jingeh ba la pynsngew da ki paidbah, u Myntri Rangbah u la shim ïa ka jingïarap jong ki ophisar na ki tnad treikam bapher-bapher ban jubab halor kine ki jingeh ba la pynsngew da ki paidbah.
