Khliehriat, Naitung 07
Na ki saw ngut kiba shah pynïap dusmon ha shnong Umpleng, East Jaiñtia Hills District, lai ngut la ithuh ïa ka kyrteng jong ki, ha kaba ar ngut ki dei na Nepal katba uwei pat u dei trai shnong napoh ka distrik.
Kine ki lai ngut kiba la tip kyrteng ki dei u Ravi Rai (23 snem ka rta), uba dei na ka shnong Elam ha Mechipradesh, Nepal, u Rajesh Rai (26 snem ka rta) na ka shnong Dharan Sunsari kaba ha Koshi Anchal, Nepal bad uwei pat u Nazar Kyndait (33 snem rta) uba dei na ka shnong Dkhiah, East Pohshnong, East Jaiñtia Hills.
Lah ban pynkynmaw ba ha ka 6 tarik Naitung, saw ngut ki briew ki la shah pynïap dusmon da kaba sheh teh lang hajuh ïa ki kti ki kjat bad shah mait da ki kynja wait na khlieh bad ryndang. Ïa kine ki briew la lap da ki paidbah ha lyndet ka Ïew Umpleng.
Ki heh pulit ha ryngkat ka kynhun CSU, Mobile Forensic Crime Scene Unit bad u Majistor ki la wan poi mar-mar sha kane ka jaka ban bishar bniah ïa ka jinglong-jingman bad ban lum ïa ki sakhi-satar.
Namar ka jingshyrkhei ka rukom shah pynïap, ka tnad pulit ka la thaw ïa ka kynhun tohkit ba kyrpang (Special Investigation Team-SIT) ban ïarap lem ha ka ban pynlong ïa ka jingtohkit halor katei ka jingjia.
Haduh mynta, ki pulit kim pat shym la lapksai ne ïoh kem ïano-ïano ruh halor kane ka jingjia shah pynïap jong kitei saw ngut.
