Shillong, Naitung 07
U nongaiktien ka Voice of the People Party (VPP) Dr. Batskhem Myrboh, u la ong ba ka seng kan nym pat jied ïa ki nongkitkam ha ki katto-katne ki konstitwensi namar mynta ki nongïalam ki dang bunkam ban leit sha ki konstitwensi ban leit ai khublei ïa ki paidbah kiba la pynjop ïa u kyrtong ka VPP u Dr. Ricky AJ Syngkon ha kane ilekshon MP sha Lok Sabha.
U la ïathuh ha ka jingïalang kaba la long ha ka 8 tarik Jylliew 2024 ha Smit, ka dei ka jingïalang ai khublei ïa ki paidbah hadien ba la ïoh ïa ka jingjop ha ka ilekshon MP haba la ñiew ïa ki vote ha ka 4 tarik Jylliew 2024.
U la ïathuh ba mynta ki hap leit sha man ki konstitwensi ban ai khublei kyrpang ïa ki paidbah ki bym shym la ïoh wan ha katei ka sngi (8 tarik Jylliew) kaba la long ha Smit.
Nalor kane, u la pyntip ba ka seng kan nym pat jied nongkitkam ha katto-katne ki konstitwensi wat hadien ba la jop ïa ka ilekshon MP, hynrei kin dang treikam beit tang kito kiba la ju treikam ha kane ka ilekshon MP.
Haba ïadei bad ka jingpynkhreh ïa ka ilekshon MDC, u Dr. Myrboh u la ong ba mynta ka seng kam pat ïakren eiei ïa ka ilekshon MDC namar ki nongkitkam ki hap ban leit pyndep ïa ka jingïalang ai khublei sha baroh 36 tylli ki konstitwensi.
Kum ban shu pynkynmaw, ki don ki konstitwensi ki bym don nongkitkam hynrei ha ka ilekshon MP Lok Sabha ki paidbah ki ai jingkyrshan ïa u kyrtong jong ka VPP u Dr. Ricky AJ Syngkon.
