Tura, Naitung 07
Ki bahaïing bahasem jong uwei u nongshong shnong ka Tura, u Niksamseng Marak (36 snem ka rta), ha ryngkat ki dkhot ka Achik State People’s Front (ASPF) ki la ujor mukotduma shah pynïap hadien ba la lap ba u khun jong ki u la ïap hapoh karma sum jong ka ‘Rehabilitation Centre’ ha Goalpara, Assam.
Hadien katei ka jingujor, kumba 7 ngut ki briew na katei ka ‘Rehabilitation Centre’ ki la shah kem bad ki pulit ki la pyntikna ba kin dang don shuh kiba shah kem haba ïadei bad kane ka jingjia.
Katkum ki khubor, u Niksamseng u dang leit sha Guwahati bad u la ïakynduh ïa 2 ngut ki briew kiba u ithuh bad kiba kwah shong kali bad u. U Marak u la shah ïa ki ban rung ha kali. Hynrei ka kali jong ki ka la shah pynsangeh hajan jingkieng Krishnai ha ki pulit bad la kynnoh ba ki la shah bat ha ki pulit ka Krishnai la kumba 8 kynta eiei.
Hynrei ki bahaïing ki la kynnoh ba la phah ïa u Marak sha ‘Rehabilitation Centre’ khlem ka jingmynjur jong ka ïingbishar bad dei nangne ba la sdang kiei-kiei baroh.
Ïa u Marak la phah sha New Life Foundation Rehabilitation Centre ha ka 3 tarik Naitung bad ki bahaïing ki la kyndit ban tip ba u la ïap da kaba sdien phasi ha karma sum ha ka sngi kaba bud, 4 tarik u Naitung, hapdeng 12 baje mynsngi – 4 baje janmiet.
Namar ka jingbym ngeit ïa ka jingong jong ka ‘Centre’, ki bahaïing ki la ap ïa ka kaiphod ‘Post Mortem’ kaba la kdew shai bad kyntait ïa ka jingshim noh ïa ka jingim lajong. La kynnoh ba u Marak u la shah shoh ha ban da ïap ha uwei ne palat ngut ki dkhot jong ka ‘Centre’ bad ki nongpynïap ki la pyrshang ban pyni ïa kane kum ka jingïap da kaba shim hi ïa ka jingim lajong.
Ha ka ejahar ba la ujor da ki bahaïing, la dawa ïa ka jingtohkit kaba bniah haba ïadei bad katei ka jingjia.
“Ngi la shah ïalam bakla ha ka ‘Rehab Centre’ halor ka daw jong ka jingïap u Niksamseng. Ha kaba sdang, ki la ong ba u la sdien phasi ïalade ha shuwa ban ong ba u la shim noh la ka jingim da kaba sangoh bunsien ïa ka khlieh ha kynroh. Hadien, ki la kylla ktien na kane bad ong ba ka don ka jingïashoh hapdeng ki nongpang kaba la ïalam sha ka jingïap jong u,” la ong ka ejahar.
Kaba shipara bad uba khlad ka la ong ba ym shym la don kano-kano ka dak mong ha khlieh katba ka met ka don ïa ki dak kiba pyni ba u la shah shoh dusmon.
“Ka don ka jingmynsaw jur ha ka tmoh, kjat, syngkai bad ka dak shah dung tari ba jylliew ha ka bynta sha ka-diang jong ka durkhmat. Ka kdew shai ba u la shah shoh dusmon, shah dung bad shah pynshitom shuwa ban ïap. Ka kaiphod ‘PM’ ka ong ruh ba ka jingïap kam dei da kaba shim ïa ka jingim lajong bad ngi don ka kopi jong ka kaiphod. Haba ngi la tohkit bniah, ngi la lap ba ka ‘Centre’ kam don ïa ki kot ki sla ba biang bad ym don iwei ruh na ki, kiba don ïa ka ‘Psychiatric’ ne ‘Psychological’ ‘Degree’. Donkam ban tohkit ïa katei ka ‘Centre’,” la ong kaba shipara bad utei uba la khlad.
Ha kawei ka liang, ka nongïalam jong ka ASPF, ka Bernita Marak ka la pyntip ba ki bahaïing ki la kynjoh ktien sha ka ha ka por mynmiet ban pan jingïarap na ka. Naba kam shym la lah ban poi, ka la pyntip sha ki dkhot ka seng kiba ïajan bad ka Goalpara ban ïarap ïa ki bahaïing bahasem jong utei uba la khlad.
“Ngi la kynjoh ktien sha u DC, SP bad ngi la dawa da ka jingtohkit kaba bniah haba ïadei bad kane ka jingjia. Hadien ka ejahar, 7 ngut ki briew ki la shah kem bad kin dang don shuh ki ban shah kem. Donkam ban khang shi syndon ïa katei ka ‘Centre’ bad ban pynshitom da kaba tyngeh ïa kiba donkti. Um shym la tip ba ki briew kiba u la shah rung ha kali ki dei ki nongkhaïi drok bad u la duh noh la ka jingim khlem kano-kano ka jingbakla jong u. Kane ka bym lah pdiang bad ngi dawa ba dei ban pynïoh ïa ka hok na bynta ki bahaïing,” la ong ka Bernita ha ka kyrwoh.
Ka Bernita ka la bynrap ba hadien ka jingshah kem jong u, ki pulit ka Krishnai, khlem ka jingmynjur jong ki bahaïing, ki la phah ïa u sha katei ka jaka.
Ïa ka ejahar la ujor ha ka 5 tarik Naitung ha thanat Goalpara, Assam.
