Shillong, Naitung 07
Ka Shongknor (Chairperson) jong ka National Commission for Women, ka Rekha Sharma ka la poi ha kane ka nongbah ban ïashim bynta ha ka workshop bad regional conference ha kaba ïadei bad ki kynthei trai muluk kiba seng kam lajong shabar na ki mar khlaw.
Kane ka jingïalang kan long ar sngi lynter ha ka 8 tarik bad 9 tarik mynta u bnai ha State Convention Centre halor ka phang pdeng “ka jingkyntiew ïa ka seng kam lajong hapdeng kynthei trai muluk ka Thaiñ Shatei Lam Mihngi lyngba ki kam kiba long shabar na ki mar khlaw. Ïa kane ka jingïalang yn pynlong da ka National Commission for Women ha ryngkat ka Meghalaya Biodiversity Board.
Kumba 200 ngut ki kynthei na nongkyndong kiba seng kam lajong, ki dkhot jong ki seng kiba kyrshan ïalade (self help group), kiba thung ïa ki kynbat dawai nalor kiwei pat ki nongdonbynta ha kine ki kam kum ki stad pule bniah bad kiba donbynta ha ki karkhana nalor ki nongpynkoit lyngba ki dawai kynbat bad ki nongdie dawai tynrai bad kiwei.
