Shillong, Naitung 07
Ka tnat Transport kan bteng ban talasi ïa ki ar shaka kiba kamai taksi beaiñ khlem bud ïa ki kyndon kumba la bud lem da kiwei pat ki nongñiah ar shaka kiba kamai ha kane ka nongbah Shillong khamtam namar ki don katto-katne ngut kiba mut ban leh ha ri lajong katba mon da kaba kren beiñ ruh ïa ki Enforcement ka tnat Transport kiba pyndep ïa ka kamram jong ki.
Ka Sorkar Jylla ha u snem 2023 ka la dep ban mynjur ïa ka kyndon aiñ kaba tip kum ka Meghalaya Taxi Aggregator Operation Rules ha kaba la shah ïa ki ar shaka ban kamai kum ki taksi da kaba pynrung kyrteng shwa bad kano-kano ka kompani kaba la ïoh laisen na ka Sorkar.
Ka jingshim kabu kiba ñiah ar shaka ban kamai khlem da bud ïa ki kyndon aiñ ka dei ruh kaba buh jingma ïa ki nongleit jingleit kiba hap ban shong da kine ki ar shaka bad phah leit buh sha ki jaka kiba ki thmu ban leit khnang ban poi kloi namar ba jur palat ka dheng kali.
Ki Enforcement ka tnat Transport ki la sdang ban talasi ïa ki ar shaka kiba kamai beaiñ namar ka Sorkar ka la dep ban pyntreikam ïa ka aiñ bad ki la don ruh ki kompani kiba la ïoh laisen ban pynrung kyrteng ïa ki taksi ar shaka kiba dei ban kamai.
Ka Sorkar Jylla ka la ithuh ïa ki ar tylli ki kompani na kane ka Jylla kita ka Jetz 24×7 bad Anyride kiba la ïoh laisen ban pynrung kyrteng ïa ki nongñiah ar shaka ban kamai da kaba pyndonkam ïa ka App jong ki.
Na ka liang ki nongñiah taksi saw shaka ruh ki la pynkhih win ïa ka kompani Rapido namar la kynnoh ba kane ka kompani ka khlem bud ïa ki kyndon jong ka Jylla ha kaba ki la don ruh bun tylli ki taksi ar shaka kiba la kamai ha ka kyrteng jong ka kompani Rapido.
Nalor kiba kamai ha ka kyrteng jong ka Rapido, ki don ruh kiba shu kamai khlem da pynrung kyrteng bad kano-kano ka kompani kaba don ha kane ka Jylla.
“Ka Sorkar ka dei ban tehlakam ïa kine kiba kamai beaiñ kum ki taksi ar shaka khlem da bud ïa ki kyndon kumba la bud lem da kiwei pat. Ym lah ban shu shim kabu ha ka kyrteng ka jingduk bad jingthngan bad leh katba mon. Lada ka Sorkar ka shah ïa kine ki ar shaka ban kamai katba mon, hato ki kali shimet ruh ki lah mo ban kamai katba mon?” la pynpaw kiba bun ki nongñiah kali kamai.
Ha ka Sngi Saitjaiñ, ki Enforcement ka tnat Transport ki la shah kren beiñ bad shah timsih tang namar ba ki talasi ïa ki ar shaka ban lap ïa kiba shu kamai beaiñ khlem da bud ïa ki kyndon aiñ.
U don ruh uwei u briew uba la kren pathar ïa ki briew ka tnat Transport ha ryngkat ki ktien sih bad u la ong ruh ha u prah, haba u pynksan ïalade bad buh jingkylli ïa ka jingtalasi ka tnat Transport ïa ki ar shaka kiba kamai beaiñ.
