Shillong, Naitung 07
U MP ka Congress na Tura Parliamentary konstitwensi, u Saleng A. Sangma u la ong ba un ïatreilang bad u MP ka Shillong Parliamentary konstitwensi, Dr. Ricky A.J. Syngkon halor ki mat ba ïadei bad ka bha ka miat jong ka Jylla.
Haba jubab la ka don ne em ka jingïatreilang hapdeng ki 2 ngut ki MP ka Jylla, u Sangma u la ong ba u la pyrshang ban ïakren bad u Dr. Syngkon halor ki katto-katne ki mat.
“Ngi la ïa bam ja lang ruh ha kaba u Bah Vincent H. Pala u la pynbeit ïa kane ha ryngkat ka jingdonlang u MP ka VPP bad u Bah Ardent Basaïawmoit. Ngin ïa peit lehse ïoh ka don kano-kano ka mat haba ïadei bad ka Jylla, ngin ïaid shakhmat bad kane, ym tang jong ka Jylla hynrei jong ka Thaiñ Shatei Lam Mihngi baroh kawei,” ong u Sangma haba kren sha ki lad pathai khubor ha ka Sngi Saitjaiñ hadien ka jingïalang pynkup burom ïa u da ka Meghalaya Pradesh Congress Committee (MPCC).
Halor ki mat kiba hakhmat eh ba un rah hapoh ïingdorbar kum u MP, u la ong, “Ngi don bun bah ki mat…ka don ka pule-puthi, ka koit ka khiah, kam khappud, ILP, Khyrnit ba 8 khnang ba ki briew jong ngi, ki samla jong ngi, kin ym donkam ban ïapeiñ hadien-habud haba ïadei bad ki eksamin kam (ba hap ïakhun) ki ban pynlong da ka Sorkar Pdeng,” ong u Sangma.
Haba phai sha ka jingsngap jar ka Sorkar Pdeng halor ka Inner Line Permit (ILP), u MP u la ong ba kano-kano ka mat ba ïadei bad ki nongshong shnong ka ri, yn ym lah ban shu ieh noh kumto.
Ha kajuh ka por, haba ai nuksa halor ka jingïakynad ha Manipur, u la ong, “Lada ki ïai bteng ban sngap jar halor ka Manipur…peit da ki hajar ngut ki la sakma na la ki ïing ki sem ha Manipur bad ki sngap jar halor kane…ha ka sngi ba ki MP ki la tur sha ka jaka pdeng jong ka ïingdorbar, hangta u Myntri Rangbahduh u la sdang ban kren. Kumta halor kane ka mat, ngan sa ïakren bad ki MP ka Congress, mynta ngam long marwei…mynta ngi don 100 tam bad ngi don ïa ka nombor ban ïakhun halor ki mat na bynta ki nongshong shnong.”
Shuh shuh la ka seng kan kynjoh ne em sha ka VPP ban ïadon bynta lang bad ka ‘INDIA Bloc’, u President ka MPCC, Bah Vincent H. Pala uba la don lang ha kane ka sngi, u la bynrap “Hooid, ngin pdiang ïa ki, nga la pynsngew ruh ïa kane wat sha ki bor ba halor ka AICC, te ngi pdiang ïano-ïano kiba kyrshan ïa ka nongrim jong ngi. U Saleng u ju ïakren bad ki na ka por sha ka por, hynrei ha kajuh ka por, ngi burom ïa ki nongrim jong ki bad ka rai kaba ki shim. Hynrei lada ngi donkam ïa ki, bad kyrpad ïa ki, lada ki wan, ngin pdiang, ngim don eiei halor kane.”
