Shillong, Naitung 08
Ki dkhot jong ka Khasi Students’ Union (KSU) ha ka Lah Sngi U Blei ki la ïoh ban pynphai ne phah noh ïa ki spah ngut ki bar jylla na ka jaka ba ki wan hadien ba kim shym la don ïa ki work permit bad laisen bylla.
Kane ka jingkhynra ba la pynlong da ka KSU ka la long ha ka Lah Sngi U Blei ha Mawlai bad Mawprem. Ha Mawlai ka seng ka la ïoh ban beh noh ïa 117 ngut ki bar jylla kiba la wan trei bylla khlem ki kot ki sla ba biang bad kumjuh ruh na Mawprem la ïoh ban beh ïa palat spah ngut.
Ka jingpynlong jong ka KSU ïa kane ka jingtalasi ha ka thaiñ Mawlai bad Mawprem, ka dei ruh shibynta ban pynbor ïa ka Sorkar ba kan pyntreikam noh mardor ïa ka Inner Line Permit (ILP) bad ka Meghalaya Residents Safety and Security Act (MRSSA), 2016.
Ha kane ka jingtalasi, ka la don ruh ka jingïarah placard kaba don ïa ki jingthoh, “Ngi don ïa ka KHAD (Trading by Non-Tribal) Regulation, 1959. Ngi don ïa ka Inter-State Migrant Workmen (Regulation of Employment and Conditions and Service) Act, 1979 kiba lah ban ïakhun ïa ka jingrung kyrthep ki bar jylla hynrei kito kiba don ha ka bor kim kwah satia ban pyntreikam ïa ki. Kumta, ngi ka KSU ngi don ïa ka hok ban pyntreikam ïa ki aiñ ba la don lypa lane ban thaw aiñ na ka bynta ka jaidbynriew haba kito kiba don ha ka bor kim shym la leh eiei”.
Ka seng ka la ong ba ha kane ka jingkhynra ‘Work Permit’ la lap ba baroh kine ki bar jylla kim shym la don ïa ka work permit bad kaba kham sngew lyngngoh ka long ba kim shym la don wat tang ka EPIC ruh ban pynshisha ba ki dei ki nong India.
U President ka KSU Mawprem u samla Aristone Thabah u la ong, “Ngi la pynlong ka jingkhynra ïa ka work permit bad shem ba don da ki spah ngut ki nongbylla bar jylla ki bym biang ki kot ki sla”.
“Ngi na ka por sha ka por ngi ju pynpaw sha ka Sorkar halor ka jingdonkam ban pyntreikam noh ïa ka ILP bad MRSSA hynrei kam shym seisoh. Ka jingtalasi mynta ka sngi ka dei ka jingsdang. Ngi phah ruh ïa ka khubor kaba shai sha ki kontraktor ba ki dei ban pynthikna ba ki nongbylla ba ki wan ïalam ki dei ban don ïa ki kot ki sla kiba biang lym kumta ka KSU kan phah leit phai noh ïa ki,” u la ong.
