Shillong, Naitung 08
Ki samla kiba ju kamai da ki thuk-thuk ar shaka hapoh nongbah Shillong ki la pynpaw ka jing-sngewsih bad sngewbynñiaw shikatdei eh halor ka jingthmu ban khang noh ïa ka jingkamai da ki arshaka hadien na ka liang ka tnad Transport ka la kheiñ ïa ki kum kiba kamai beaiñ namar bym don ïa ka Permit kaba biang na ka shlem treikam jong u District Transport Office (DTO).
Haba ïoh ban ïakren bad ki katto katne ngut ki samla kiba ju kamai da ki ar shaka, ki la ong ba kiba bun napdeng kiba kamai da ka thuk-thuk ki dei kiba wan na ki longïing-longsem kiba jynjar bad kumta ka la pynlong ïa ki ba kin kamai da kane ka lad bad ki la ong ruh ba watla ki la pyndep ïa ki jingpule hynrei kim ïoh kam-ïoh jam satia.
Kitei ki samla ki la ong ba lada ka sorkar ka buh ïa ki jingbthah ba kum ki nongkamai thuk-thuk ki dei ban bud, ki kloi ban ïatreilang bad ka sorkar.
Kitei ki samla ki la ong ba ka jingtalasi jong ka shlem treikam u DTO lyngba ka tnad Enforcement ha ryngkat bad ki Inspector ha ka Sngi Saitjaiñ kaba long hak-dak ka long kaei-kaei kaba ym sngewïahap namar ba kum ka tnad ka dei ban ai jingtip ne ka jingmaham hashwa ban leh ïa kane namar kane ka ktah ïa kiba duk ba suk.
Shuh shuh ki la ong ba ka jingpynlong ïa ki ban kamai lyngba ka ‘Offline’ ka dei namar ba ka dor jingïoh ka duna shaba palat nalor ba hap ban siew sa ïa ka khajna ne ka GST sha ka kompani Rapido.
Ki la ong ba kum ki nongkamai, ki kamai mynstep bad bam ha ka por mynmiet bad kum ka sorkar ka dei ban pyrkhat na ka bynta jong ki.
Ki la ong ruh ba kum ki khynnah haba ki don ïa ka kam ka jam ki lait na ka jingsniew kiba har rukom hynrei lada kim don ka kam ka jam pat, ki poi ban leh ïa ki kam kiba sniew.
“Ka sorkar ka dei ban pyrkhat na ka bynta jong ngi nalor ka kam ka jam ngim ïoh”, la ong kitei ki nongkamai.
Kitei ki samla ki la ong ba lada ka sorkar ka kheiñ ba kitei ki nongkamai ki long beaiñ haduh katta-katta ka dei ban talasi bad khynra ïa ki bar jylla kiba wan rung bad kamai na kane ka ri.
”Hato ma ngi u trai muluk-trai khyndew ngim don hok ban bylla hapoh ka Ri jong ngi? Hato kam ban mo ka jingeh ïangi kum ki khun samla? Na ka liang jong ngi kum ki khun samla ka Hynñiewtrep, ngi kwah ba hashwa ba phin bat ïa ngi, sngewbha bat ïa ki bar jylla”, la ong kitei ki samla.
