Shillong, Naitung 08
U Deputy Chief Executive Member ka KH-ADC u Bah Pynshngaiñ N Syiem u la pyntip ba ka jingshim kam bishar halor ka jingkynnoh pyn donkam pisa bakla ka Hima Mylliem bad Raid Mylliem kaba long `5.58 klur eiei hi ka dang ïaid shakhmat.
Haba kren sha ki lad pathai khubor ha ka Lah Sngi U Blei, u Bah Pynshngaiñ u la ong ba ka Council ka la sngap ïa katei ka jingkynnoh ha ka 2 tarik u Naitung, 2024.
Kum ban shu kdew ba katto katne ngut ki Myntri ka Hima Mylliem ha ka jingmudui kaba ar katkum ha ka 9 tarik u Jymmang, 2024 sha ka Council, ki la kynnoh ba u Syiem ka Hima Mylliem, u Pa’iem Ainam Manik Syiem bad ki khlieh ka Raid Mylliem ba kynthup ïa u Lyngskor bad u Secretary ba ki donkti ban pynjah klep ïa ka pisa ba 5 klur 58 lak 30 hajar 451 tyngka.
Katei ka pisa ka dei kaba la ïoh kum ka bai siew lutksan na ka bynta ka jaka ha ïew Mylliem Rim ba la shim da ka Sorkar Jylla ban pynïaid ïa ka projek surok Shillong-Dawki hynrei la kynnoh ba katei ka pisa kam shym la rung sha pla tyngka (Account) jong ka Hima Mylliem.
Shwa kane, ki Myntri ki la phah sha ka KHADC ïa ka ujor banyngkong ha ka 21 tarik, Risaw, 2023 bad ïa ka jingbishar kam arliang mamla na bynta ar tylli ki jingujor la pynlong ha ka 2 tarik u Naitung, 2024 ba la pynbeit da u Dy CEM ka KHADC uba khmih ïa ka tnat Elaka u Bah Pynshngaiñ N Syiem ban tohkit bniah halor kine ki jingujor jong ki Myntri pyrshah ïa u Syiem.
Lah ban pynkynmaw ba halor kane jingujor ha ka 21 tarik u Risaw, 2023, u Pa’iem Ainam u la jubab da ka jingthoh sha u Deputy Secretary ka KHADC ha kaba u la pynshai ïa ki jingkynnoh bad kyntu ïa ka KHADC ban kyntait ïa ka jingujor.
Katei ka jingujor pyrshah ïa u Syiem bad ïa ki katto katne ngut ki Myntri ka long hadien ba la ïohi ïa ki kam ba kim long kiba ïahap bad ka riti ka dustur bad ka synshar ka khadar. Ka jingujor ka long ruh halor ka jingpynduh bai rneng ïa ki Myntri da u Syiem kaba paw ruh kum ka jingleh donbor. Ki la ong ba ka jingsynshar jong u Syiem Ainam ka long palat na kaba palat liam namarba ïa ka dorbar ruh um ju khot tikna bad katkum ki kyndon ba dei ban khot shisien shisnem hynrei kata ruh um ju khot satia.
La ong ba ka jingkheiñ jingdiah ba ka Hima ka dei ban ai shisien shisnem hynrei mynta la hynriew snem u Syiem um pat ai jingkheiñ wat tang shisien ruh.
Shuh shuh la ong ba ha kaba ïadei bad ka khyndew ka shyiap, ka long kaba sngewsih ba u Syiem u leh khlem da khot ïa ka Executive Dorbar bad ka Dorbar Pyllun khamtam ïa ki kam kiba heh kiba ïadei bad ka Mylliem bad kiwei kiwei kiba ki Myntri ki la ujor.
