Nongpoh, Naitung 08
Da ki spah ngut ki paidbah jong ka thaiñ Jirang ha ka Lah Sngi U Blei ki la mih sha surok ban pynlong ïa ka jingïaid paidbah ban pynpaw ïa ka jingpyrshah jur halor ka jingshah kem kaba khlem nongrim jong u Bah Bakstar Diengdoh na ka shnong Belahari ha ki bor jong ka tnat Khlaw ka jylla Assam ha kine ki khyndiat sngi ba la dep.
Ha kane ka jingïaid paidbah, la ïohi ïa ka jingwan shim bynta shitrhem naduh ki nongïalam shnong, ki samla, ki khynnah skul, ki longkmie, ki rangbah bad ki nongïalam jong ki seng bapher bapher kiba la rah ryngkat ki lama ïong, ki jingthoh pynrem ïa ka tnat Khlaw bad ïa ka Sorkar Assam bad dawa ba ka Sorkar Jylla ka dei ban shimkhia mardor ban pyllait ïa utei u rangbah khlem ka jingteh kyndon.
Hadien jong ka jingïaid paidbah, ki nongïalam jong katei ka jingïalang hapoh ka shatri jong Ka Sur U Paidbah Western Ri Bhoi, ki la leit mih sha ka ophis jong u Sub-Divisional Officer ka Patharkhmah Civil Sub-Division, hynrei phewse naba utei u heh ophisar, um don satia ha katei ka jaka treikam, ki nongïalam, ki la shim pat ïa ka rai ban leit sha Nongpoh bad kynduh ïa u Deputy Commissioner ka Ri Bhoi, u Abhilash Baranwal.
Lyngba katei ka jingïalang, ki paidbah ryngkat bad ki nongïalam kiba la ai jingkren, ki la pynrem jur ïa ka Sorkar Assam lyngba ka tnat khlaw bad ruh ka tnat pulit, kiba la kem ïa utei u rangbah na ka shnong Belahari tang na ka daw ba u pynbha ïa ka surok shnong na Mawdem sha Belahari, kaba la iehshrah da ka sorkar jylla mynta da ki phew snem lynter.
Ki nongïalam, ki la ïathuh ruh ba ki paidbah ha katei ka thaiñ khappud ki ju mad jingeh na ka por sha ka por namar ka jingwan thombor jong ki bor sorkar Assam kaba la pynshong syier bad wanrah jingthut ruh ha ka shongsuk shongsaiñ.
Na ka liang ki nongïalam ki la dawa jur ba ka sorkar jylla hapoh ka jingïalam jong u Conrad K Sangma kum u Myntri Rangbah ka dei ban shimkhia mardor ïa ka kam ban ïakren bad ka sorkar Assam na ka bynta ban pyllait noh mardor ïa utei u rangbah na ka shnong Belahari khlem kano kano ka jingteh kyndon bad ruh ban pynsangeh ïa ka jingwan thombor ki bor sorkar ka jylla Assam na ka por sha ka por ha katei ka thaiñ.
Shuh shuh hadien ka jingwan aiti ïa ka jingthoh sha u Deputy Commissioner ka Ri Bhoi ha Nongpoh, ki nongïalam ki la pyntip ba na ka liang jong u DC ka Ri Bhoi, u la kular ban shimkhia halor kane ka kam bad ïakren bad ki bor jong ka sorkar Assam na ka bynta ban pyllait noh ïa utei u rangbah hapoh kine shi-sngi ar-sngi.
