Shillong, Naitung 08
U Myntri ka tnat Bording ka Jylla, u AT Mondal u la ong ba ha ki jaka sor ne nongkyndong ki jingeh ki ïasyrïem ha kaba ïadei bad ka bording ilektrik bad u la bynrap ha kine ki san snem ban wan, ka bording ilektrik ha man la ki shnong jong ka Jylla kam dei shuh ban dang don jingthut.
U Mondal u la ong ïa kane haba u ai jingkren ha jingïakynduh lang bad ki Nokma bad nongïalam shnong ka thaiñ Gambegre ha ka Lah Sngi U Blei ha kaba ïadei bad ka jingsam bording ha ki shnong kum ha Aminda Rangsa, bad Gambegre, West Garo Hills district.
U Mondal u la ong ba ka sub-station ka dei ban long ha ryngkat ka jingdon ki kor ki bor katkum ka juk stad mynta bad ka bor jong ka ilektrik ka dei ban kham biang.
La synran lang ïa u Myntri da u Sanjay Goyal, uba dei u Commissioner & Secretary ka tnat Bording bad uba dei ruh u Chairman-cum-Managing Director ka Meghalaya Electricity Corporation Limited (MeECL) nalor ki ophisar ka MeECL.
U Mondal u la ong ba ki jingeh kiba la pynsngew da ki nongsynshar shnong u la dep ban buh jingthoh bad haba ki ophisar ruh ki don lang, ki jingeh kiba ïakynduh yn kham lah ban ïakren bad pynbeit katba lah.
U la pyntip ba ka sub-station kaba thymmai la dep ban buh ha Damalgre ha kaba hapdeng ar ne lai bnai ka dei ban treikam. Ki don lai tylli ki shnong ha Gambegre ki bym pat ïoh ilektrik bad u la ong ba yn sa peit ïa kane khnang ba ka ilektrik ka dei ban don.
U la ong ruh ba ha ki sngi ba slap, khie ‘erïong, ki laiñ ba pynïaid ïa ka bording ilektrik ki ju thut bad hap ban maramot bad pynbiang shwa ïa kita.
“Baroh ki longïing ha ki shnong ki dei ban ïoh bording ilektrik bad ki surok bad jingkieng rit lah ban shna da kaba pynrung lang bad ka MGNREGS.
Shuh shuh u Myntri u la lum jingïalang ban khmih ïa ka jinglong-jingman ka bording ilektrik ha Rilum Garo bad u la bthah ïa ki ophisar ban peit ba ka bording kan don khamtam lei lei hadien ba ka jingjur slap hapoh ka thaiñ kaba pynlong ruh ban julor ki laiñ ba ïaid ka bording
Na ka liang u Commissioner and Secretary ka tnat Bording, u Sanjay Goyal u la ong ba ka jingïalang kaba la lum ka long ban sngap ïa ki jingeh kiba mad da ki paidbah bad ban shim ki lad kumno ban lah pynbeit ïa ki jingduna.
U la ong ruh ba kane ka jingïakynduh lang ka dei ruh lyngba ka jingkdew lynti u Myntri Rangbah u Conrad K Sangma bad u Myntri ka tnat Bording ha kaba mynta la phaikhmat ban peit ïa ki jingeh ha la ki block ki block khamtam eh ha ka liang ka bording.
Kumta u la ong ba ka MeECL bad ka tnat bording ki pyrshang katba lah ban pyntikna ba yn ïoh ka bording kaba lah ban shaniah bad kham duna ki jingthut khamtam haba ka thaiñ kan ïoh ïa ka sub station ka ban pyntikna ba ka jingsam bording kan long kaba neh bad kaba ïai bteng.
U Goyal u la ong ba kum kane ka jingïakynduh kan ïarap shisha ïa ka tnat bording ban kham sngewthuh ïa ki jingeh kiba mad da ki nongshong shnong bad kan nang pynbha ïa ka rukom treikam ka tnat bording.
