Shillong, Naitung 08
Ka All Meghalaya Karate-Do Association (AMKA) ka la ïaid shakhmat ban khreh pynlong biang ïa ka lympung ïalehkai Karate Championship na ka bynta ki khynnah skul bad ki samla pule kolej mynta u snem.
Kane ka jingïakob yn pynlong ha ki lai sngi kata naduh ka 22 tarik haduh 24 tarik Nailar, 2024.
Ïa kane ka lympung ba la tip kum ka 30th Inter School bad ka 12th Inter College Karate Tournament 2023 yn pynlong ïa ka, ha Multipurpose Indoor Hall jong ka Sport Authority of India ha Shillong Training Centre kaba don ha NEHU campus, bad ïa kane yn pynlong da ka AMKA ha ryngkat ka jingkyrshan jong ka Directorate of Sports and Youth Affairs, ka Sorkar Meghalaya.
La khmih lynti ba ha kane ka jingïakob karate kaba lai sngi lynter kin don bun ki nongïashim bynta na ki skul bad ki kolej.
Ki nongïalehkai Karate kiba la lah ban pynpaw ka jingtbit ka jong ki ha ka kyrdan kumite (sparring) bad kata (form) bad bun kiwei pat ki ‘martial arts’ ki la kiew shajrong na kum kine ki lympung ha ki snem kiba la leit, ha ki kyrdan National bad International da kaba jop takma na ka bynta ka Meghalaya bad ka India.
Haba phai sha u snem 2023, ka lahduh ha ki skul, ka la long ha ka St Anthony’s Higher Secondary School ha ka Inter-School Boys bad ka OM Roy Memorial Higher Secondary School ha ka Inter-School girls bad ka St Anthony’s College pat ha ka Inter College.
Kumta ki skul bad ki kolej kiba kwah ban ïashim bynta ha kane ka jingïakob kaba mynta u snem, ki lah ban phone ha kine ki number na ka bynta ban ïoh ban ïakren bad ki dkhot jong ka AMKA: kata ha u number 9774062118, 8837348536, 9856623718, 9378186278, 8794468993.
