Shillong, Naitung 08
Hadien phra bnai naduh ba la thaw ïa ka Delimitation Committee ha u bnai Risaw mynshem snem, ka Delimitation Committee jong ka KHADC ka la ïoh ban aiti noh ïa ka kaiphod kaba la pynkhreh sha u Deputy CEM Bah Pynshngaiñ N Syiem.
Ïa kane ka kaiphod la leit ban aiti ha ka sngi Nyngkong da ki dkhot ka delimitation committee hapoh ka jingïalam jong u muktiar ba la shongthait ka District Council Court u Bah Starlwell Kharsyiemlieh ha ka kamra treikam jong u Dy CEM.
Ki dkhot jong kane ka delimitation committee, nalor u Chairman Bah Stralwell Kharsyiemlieh, ki kynthup ruh ïa u MLA barim u Dr. SL Marbaniang, u nonghikai ha ka skulbah NEHU u DRL Nonglait, u nonghikai ba la shongthait Bah R Myrboh bad u Secretary barim ka KHADC u Bah M Kharkrang.
Haba kren sha ki lad pathai khubor, hadien ba la dep ban aiti ïa ka kaiphod, u Chairman u la ong ba kane ka committee ka la trei shitom bad la lah ban wanrah ïa ka kaiphod katkum ka jingbthah bad ka bor ba la pynkhamti ha ka committee ban pynhap thymmai ïa ki shnong katkum ka jinglong ka jaka bad ka jingbun paid.
“Ngi la dep ban ai ruh ïa ki jingai jingmut ki jong ki ha ka kaiphod ba la aiti sha ka EC bad ngin nym lah ban ong eiei halor kane bad dei tang ka EC kaba lah ban ïathuh bniah halor ka kaiphod,” u la ong.
U Bah Kharsyiemlieh u la ong, ba ka jingpynhap ïa ka jingbun paid ha ki constituency kiba don hapoh ka East Khasi Hills ka kham suk naba ka committee ka la ïoh pdiang ïa ka electoral rolls jong u snem 2019 jong ka ilekshon district council. “Ngi la mad jingeh pat ha kiwei ki district, kum ha Ri Bhoi, West Khasi Hills, South West Khasi Hills bad Eastern West Khasi Hills kynthup ruh ha Sohra Civil Sub Division, naba kim shym la ïoh ïa ka electoral roll jong ka ilekshon district council,” la ong u Bah Kharsyiemlieh.
U la ong ruh ba ka long kaba eh ban pynbit-pynbiang ïa ka jingdon jong ki nongthep vote ha ki constituency kiba hap ha kine ki district tang da kaba peit na ki electoral roll jong ka ilekshon MLA lane Lok Sabha.
Shuh shuh u Bah Kharsyiemlieh u la pynshai ba kin nym lah ban pynbeit thymmai ïa ki constituency namar ka kam jong ka committee ka long ban pynbit-pynbiang ïa ka jingdon jong ki nongthep vote.
U la ong ruh ba ki don bun ki constituency khamtam ha ki thaiñ nongkyndong ki bym don jingktah eiei namar ka jingdon jong ki nongthep vote kam da ïapher than.
“Ngi la pyrshang kat-lah kat-ïai ban pynrung ïa ki jingai jingmut bad ki jingpynpaw jong ki shnong bapher bapher hynrei kan long pat kaba eh ban sngap lut baroh ki jingpynpaw,” u la ong bad bynrap “Hooid kum ka committee ngi sngewthuh ba ngin nym lah ban wanrah ïa ka kaiphod ka ban pynhun lut ïa baroh hynrei kum ka committee, ngi la sngewhun bad ka kaiphod kaba ngi la dep ban pynkhreh bad aiti.”
Ha kawei pat ka liang, u Deputy CEM u la ong, ba ka Executive Committee kan sa ïakynduh lashai ka sngi ka 9 tarik ban ïakren bad ïatai halor kane ka kaiphod.
Katkum ka jingpynpaw ka jong u, lada ka EC ka la sngewhun ïa kane ka kaiphod, kan sa wanrah pat ha ka dur jong ka Bill ïa kane ka kaiphod hapoh ka ïingdorbar jong ka council ka ban sdang naduh ka 10 tarik Naitung.
“Ngin sa kyrpad ïa ka tnat District Council Affairs ba kan pynkhreh noh ïa ka electoral rolls lada ka council kan mynjur ïa ka bill ban pyntreikam ïa ka jingai jingmut bad jingtyrwa. Kan nym shim por shuh ban pynlong ïa ka ilekshon naba kane baroh kan shong ha ka EC ban ai jingmynjur ïa ka kaiphod,” la ong u Deputy CEM.
