Shillong, Naitung 08
Ka Lumkseh SC bad ka Nongkolew SC ki la ïasam mar shi point ha ka lympung ïalehkai Under-20 Fourth Division 2024 ba la pynïaid da ka Shillong Sports Association, hadien ba ki la ïakhiad mar 1-1 kol ha ka lah sngi U Blei ha SSA Stadium kaba ha First Ground, Polo.
Ha kane ka jingïakhun jong ka Group-E, ka Nongkolew ka la ïoh ban pynkhih jar nyngkong eh lyngba u Shain Mujai ha ka minit kaba 39, hynrei ka Lumkseh ka la lah ban pynphai kylla lyngba u Pynkhlaiñstar Nongbri ha ka minit kaba 53.
Haba phai sha kawei pat ka jingïakhun jong ka Group-F kaba la long ha madan MFA hapdeng ka Pommura SC pyrshah ïa ka Lummawbah SC ki la ïasam mar shi point hadien ba kim shym la lah ban thep kol.
Kane ka lympung kan bteng biang ha ka sngi Ba-ar ha kaba ka Risa Colony SC kan ïakhun pyrshah ïa ka Laitumkhrah SC ha SSA Stadium bad ka Mawkasiang SC ïa ka Mawphlang SC ha madan MFA. Kine ki jingïakhun kin long ha ka por 4 baje janmiet.
