Tura, Naitung 08
Ki bahaïing bahasem jong u Niksamseng Marak, uba la shah kynnoh pynïap katba u dang don hapoh kawei ka ‘Rehabilitation Centre’ ha Goalpara, Assam ki la thoh sha u Deputy Commissioner (DC) ka West Garo Hills ban kyrpad ïa ka jingïada na bynta ki nongujor bad ki bahaïing bahasem jong ki.
Ha ka shithi kaba la phah ha ka Lah Sngi U Blei da kaba shipara bad utei uba la khlad, ka Kilmeline Marak, la ong ba namarba ki kyrteng bad ki durkhmat jong ki, ki la paw hadien ka jingujor, ka don ka jingtieng hapdeng jong ki bad ki bahaïing bahasem naba katei ka jingjia ka ïadei bad ki nongshong shnong ka Assam kiba lah ban pyrshang ym tang ban byrngem hynrei ban buh jingma ruh ïa ki.
Ïa u Niksamseng, la kynnoh ba u la shah pynïap ha New Life Foundation Rehabilitation Centre kaba ha Goalpara ha ka 4 tarik Naitung, ïa kaba kane ka jaka sumar ka la pyrshang ban kam ba ka jingïap jong u (Niksamseng) ka dei na ka jingshim hi ïa ka jingim lajong.
Hadien jong ka kaiphod ‘Post Mortem’ kaba la kyntait ba ka dei ka jingshim hi ïa ka jingim lajong, ki bahaïing ki la ujor ejahar ha thanat Goalpara, ha kawei ka liang kaba la ïalam sha ka jingshah kem jong 8 ngut kiba suba donkti. Sa 2 ngut kiba la shah kynnoh donkti ha katei ka kam ki don hapdeng ka jingphet rieh.
Katkum ki tyllong khubor na ki bahaïing bahasem, ka kurim jong uba la khlad, ha kine ki sngi ba la dep ka la ïoh pdiang ïa katto-katne ki ‘phone call’ na katto-katne ki briew na Assam kiba la byrngem-byrsit ïa ki, ha kawei ka liang, kaba la pynlong ïa ki ban shim ïa ka rai ban kynjoh sha u DC.
“Ngi kyrpad ïa ka jingtuklar jong phi na bynta ka jingïada pulit ban mih sha bad na Goalpara da ka nongujor bad ki bahaïing bahasem jong ki naba ka don ka jingma ïa ka jingim jong ki na kito kiba ithuh bad ki bahaïing bahasem jong kiba shah kynnoh donkti. Khnang ban ïada ïa ka nongujor kumjuh ban pynneh ïa ka shong suk shong shngaiñ ha ka imlang-sahlang, ngi kyrpad ïa ka jingïarap jong ki,” la ong ka shithi na ka Kilmeline.
