Seoul, Naitung:
Katkum ki khubor, la ong ba ka Kim Yo Jong kaba long ka para jong u nongialam ba hakhlieh duh ka North Korea- U Kim Jong Un, ha ka sngi Nyngkong ka la kynthoh halor ka jingai jinghikai bad jing pyntbit jong ka South Korea ia ki shipai jong ka ha khappud bad ka North Korea, ha kaba ka la ong ba ka South kan sa long ka “nongpyniap da lade ialade” bad ka jingmaham kaba shyrkhei ka long ia ka South Korea lada kam lah ban shah ia ka bainong ba kan ioh na ka North.
Kane ka long ruh hadien ba ka North Korea ka la pynpoi ia ki jaboh- jabaiñ sha South Korea da kaba phah ia ki balloon nalor suiñ bad ha kajuh ruh ka por ka North Korea ka la pynjur bha ia ki kam pynher ‘namding ha kine ki taiew ba la leit wat hadpeng ka jingbyrngem bad jingmaham jong kiwei pat ki ri ba marjan ba ka North Korea kam dei ban pynthud ia ka shongsuk shongshngaiñ jong ki para marjan namar ka lah ban ktah jur ia ki lada ka tnat shipai ka North Korea kam lah ban tehlakam ia kitei ki ‘namding ha ka rukom kaba dei.
Ka Kim Yo Jong, ka long ka nongrah ktien ba kyrpang jong ka North Korea bad ha katei ka sngi ka la ong ba ka thma hapdeng ka North bad ka South ka long kaba sngewtynnad ia ka North Korea bad ka kloi ban pdiang lada ka South ka tyrwa ne kwah ia ka thma.
Kumta ruh na ka liang ka North Korea ka la maham ia ka South Korea ba lada ka jingai jinghikai bad jing pyntbit jong ka South Korea ia ki shipai jongka ha khappud kan ktah ia ka North, ka North ruh kan leh ia ka kamram ba donkam khlem da pynslem lada kata ka por kan poi.
Namar la ong ruh ba ka jingïadei hapdeng kine ki ar tylli ki ri Korea ka la hiar bad sniewkat nang mih ki sngi ki snem, ha kaba ka North Korea ka la nang pynjur shuh- shuh ïa ki jingpyrshang ban pyndonkam ïa ki tiar thma bad ka la nang pynjan ruh ia ka jingiadei bad ka Russia.
