Guwahati, Naitung:
U MP jong ka Congress uba dei ruh u nongïalam jong ka ka liang pyrshah ha Lok Sabha, u Rahul Gandhi, u la poi sha Silchar kaba don ha Assam, hashwa ba un leit jngoh ïa ka Manipur.
Ha ka por ba u dang don ha Assam, u la leit ban ïakynduh ïa ki lanot kiba la shah ktah jur na ka jingshlei um kaba shyrkhiei kaba dang shen hapoh ka jylla, la ïathuh u nongaiktien jong ka seng.
Kane ka dei ka jingleit jngoh kaba nyngkong eh jong u Gandhi ha ka thaiñ Shatei-lam-Mihngi naduh ba u la long u nongïalam ka liang pyrshah.
Ka jingleit jngoh jong u Gandhi ka long ka jingleit jurip bniah ïa ka jinglong jingman bad ban ai bad tyrwa jingïarap sha kito kiba shah ktah na ki jingpynjulor jong ki bor ka mariang.
Ka jingleit jngoh jong u ka la long ruh ha ryngkat ka jingpynlong ïa ki jingïalang bad ki nongshong shnong, ki heh sorkar, ki lanot kiba la shah ktah na ka jingshlei um bad ïaphylliew jingmut bad ki kumno ban lah ban ïakhun pyrshah ïa ki jingthombor jong ki bor ka mariang.
Kumba la pynbeit, la ong ba hadien ka jingleit jngoh ïa ka Assam, u Gandhi u la leit sha Manipur, ha kaba kumba la sakhi, la ong ba kane ka jylla ka la ïakynduh jingeh shibun na ki jingjia ïakynad kiba dang jia shen.
Ha kane ka jingleit jngoh jong u, u Rahul u la leit ïakynduh ïa ki briew ki bym don jaka shong jaka sah shuh kiba dei na ka kynhun jait bynriew Meitei kiba shong basah ha ka jaka sah ba shipor ha Jiribam kaba don ha Manipur.
Ha ka por ba u la don ha Assam u la leit jngoh ïa ka jaka sah ba shipor jong ki jait bynriew Kuki-Zo.
Kumba la sakhi, la ong ba ka jingïakynad ha Manipur ka la sdang naduh ka 3 tarik Naitung jong u snem ba la dep ha kaba ka jylla ka la shah ktah jur na ka jingïakynad hapdeng ki Meitei bad Kuki, ha kaba kane ka jingjia ka la shim ïa ka jingim jong palat 200 ngut ki briew.
