Shillong, Naitung 08
Ka lympung ïalehkai State Level Subroto Mukherjee Cup Football Tournament 2024 ban pynïaid da ka tnat ïalehkai jong ka Sorkar Jylla kan sdang ha ka Sngi Ba-ar ha kaba ki kynhun kiba la rah nam lahduh ha baroh 12 tylli ki district kin pynkhreh ban ïa aireng ha kane ka nongbah.
Ïa kane ka lympung ïalehkai kaba kynthup naduh ka Under-15 ki shynrang, kumjuh ka Under-17 ki shynrang bad kynthei, yn pynlong ha ki lai tylli ki madan kata ha SSA Football Ground, MFA Ground bad ha Madan Heh Mawlai.
Ki kynhun ki ban ïakhun ha kane ka sngi sdang jong ka Under-15 ki shynrang kan long hapdeng ka Dapboklang Giri Memorial (WKH) pyrshah ïa ka Khliehriat Presbyterian HSS (EJH) ha ka por 8:30 mynstep ha madan Heh, katba ka Govt. Boys HSS (WGH) ia ka Govt. HSS (SGH) ha ka por 11:30 mynstep.
Ha ka Under-17 ki kynthei yn pynlong ha SSA Ground, Polo ha kaba ka Tyrsad HSS (EKH) kan ïakhun pyrshah ïa ka Dambok Aga UPS (SGH) ha ka por 9 baje mynstep bad ka Kyrshai Govt. LP&UPS (WKH) ïa ka Nongehram Adunai HSS (EGH) ha ka por 12 baje.
Ha ka Under-17 ki shynrang yn pynlong ha SSA Ground, Polo ha kaba ka Assam Rifles Public Shool (EKH) kan ïakhun pyrshah ïa ka por 9 baje mynstep, katba ka Lotus SS (EJH) kan ïakhun pyrshah ïa ka North Liberty HSS (WJH) ha la por 12 baje mynsngi.
Ïa kane ka lympung yn pynkut da ka jingïakhun final ka ban long ha ka 13 tarik ha kaba ki kynhun ki ban rah ïa ka nam lahduh ha baroh lai tylli ki kyrdan kin ïoh ban mihkhmat ïa ka Jylla sha ka International Subroto Mukherjee Football Cup 2024 ki ban sa long shen ha ka nongbah Delhi.
