Shillong, Naitung 08
Ka Manchester City ka la thmu ban wanrah ïa u Dani Olmo hadien ba u la pynpaw ba shisien u la kyntait ban ïashondur lang bad u Lionel Messi ha ki por ba u dang khynnah.
Une u rangïalehkai uba la lah ban thep kol na ka bynta ban pynlong ïa ka Spain ban jop da 2-1 kol ïa ka Germany lyngba ka extra time, u la don ka jingthmu ban leit ïasoh sha katei ka lahduh jong ka Premier League bad kaba la buh ruh ka jingtyrwa da €60million (£50.7m) kaba long kat kum ki kyndon jong ka RB Leipzig.
Une rangïalehkai ka Spain u la ïakynduh ïa utei u khlur ïalehkai uba la khur haduh hynriew sien ïa ka khusnam Ballon D’or ha ka por ba u dangkhynnah bad um da sngewhun ha kato ka por ban ïashon dur lang bad ki rangïalehkai jong ka kynhun. U Olmo u la ïasoh sha ka shlem ai jinghikai jong ka Barcelona ka La Masia academy ha u snem 2007 bad u la pynlut ïa ka por haduh hynñiew snem shwa ba un leit ïasoh sha ka Dinamo Zagreb.
Hynrei u Olmo u la ïakynduh ïa u Messi ha ka por ba u kpa jong u, u dang pynïaid ïa kawei ka jingïalehkai phutbol ha Castell-defels bad u la pyrshang ban kyntait ban ïashon dur lang.
Ha ka jingïakren bad kawei ka khubor u Olmo u la ong, “Shisien, shwa ba ngan ïasoh bad ka La Masia, nga la synran lang ïa u kpa jong nga ha ka por ba u dangpynïaid ïa ka jingïalehkai ha Castelldefels.
“Ha ka por nga dang don ha ka rta kaba 8 snem. Nga long uba sngewtynnad ban ïalehkai phutbol, ha kum katei ka por nga dangpyrkhat ba u dei u paralok u kpa jong u ha kaba la khot ïa nga ban shondur bad u Lionel Messi,” la byntap u Olmo u la kam da kaba ong ba u la kyntait ban shongdur lang bad u.
U Olmo uba la mih noh na ka Barcelona ha u snem 2014 hadien ba um shym la ïoh ban ïalehkai wat tang shisien ruh ha kaba u la pynïasoh noh sha ka Dinamo Zagreb.
Hadien utei u rangïalehkai ka Spain u la leit ïasoh sha ka Leipzig ha u Kyllalyngkot jong u snem 2020 watla soi ban leit phai biang sha ka Barcelona bad mynta u la shah phaikhmat ha ka City hadien ba u la lah ban ïalehkai bha na ka bynta ka Spain ha ka Euro 2024.
