Jowai, Naitung 08
Ki nongïalam jong ka Voice of the People Party (VPP) ki la khluit tar ïa ka jingbym burom mar kylliang jong uwei u MDC jong ka JHADC ïa ki ha ka por ba ki dang leit ïakynduh ïa u Chief Executive Member (CEM) jong ka JHADC u Bah Thombor Shiwat ha ka Lah Sngi U Blei.
Ki nongïalam jong ka VPP ki la kynnoh ba u MDC jong ka Sutnga Nongkhlieh u Bah RS Lyngdoh u la ong ïa ki da kaba kylli ha ka ktien phareng “Who are you (Phi dei kiei) ba ngin donkam ban ïatreilang.”
Ïa kane la ïathuh da u nongïalam ka VPP na Jaiñtia Hills u Bah Damewanhi Rymbai haba kren sha ki lad pathai khubor hadien ka jingwan ïakynduh ïa u CEM jong ka Jaiñtia Hills Autonomous District Council (JHADC) ban buddien halor ka jingduh tulop jong ki nongtrei ka council.
U Bah Rymbai u la ong ba ka VPP ka tyrwa ban ïatreilang bad ka JHADC na ka bynta ban pynbor ïa ka sorkar ban pynïoh kloi ïa ka bhah jong ka council hynrei u MDC ka Sutnga-Nongkhlieh u la kren tohmet pynban ïa ngi da kaba ong ‘Who are you ba ngin donkam ban ïatreilang’.
Kano-kano ka seng saiñ hima-sima, kynhun seng treimon sngewbha, ka council ka donkam ïa ka jingïatreilang na ka bynta ban kyntiew ïa ka council hynrei ban shu ong “Who are you (Phi dei kiei) kata kam dei ka synshar paidbah bad ngi pynrem jur ïa une u MDC”, la ong u Bah Rymbai.
Shuh shuh u la ong ka jingleit ïakynduh jong ki ïa u CEM kam dei ka kam shimet jong ka VPP hynrei jong kito kiba im jakpoh da kaba ïoh jingsiew na ka council bad pynkut ruh ïa ka jingkren da kaba ong “Ngin sa pyni ïa u, Who we are (Ngi dei kiei)”.
