Aizawl, Naitung:
Ha kaba ïadei bad ka jingïakynduh dang shen jong u Myntri Rangbahduh ka ri u Narendra Modi bad u Myntri Rangbah ka jylla Mizoram u Lalduhoma la ong ba ka jylla ka la sngewtikna ba kam lah shuh ban pynphai ïa ki poiwir ka Bangladesh kiba dei na ka jaidbynriew Bawm.
U Myntri Rangbah ka jylla uba dang don mynta ha ka jingleit jngoh sha Delhi, u la kren halor kane ka mat hadien ka jingshah kynthoh na ka liang pyrshah ha kaba ïadei bad ka jingsngap jar jong ka sorkar ha kaba ïadei bad kane ka bynta. Ha ka por ba la don ka jingïakren, u Lalduhoma u la ban jur da kaba ong ba ïa ki Bawm, kiba dei shi bynta jong ka jaitbynriew Zo, ym dei ban beh ne pynphai sha ka jaka ba ki wan.
Kane baroh ka la long ha ka por ba don ka jingïakynad ba dang shen halor ka jingpdiang ïa ki lanot na Bangladesh, khamtam kito kiba phet na ki ri jong ki na ka jingïakynad jaidbynriew ha ki lum Chittagong Tracts. Shuh shuh la ong ba nalor ka jinglong jingman halor ki phetwir, ka jingïalang ka la wanrah ruh ïa kiwei pat ki mat kiba kongsan, kiba kynthup ïa ka jingpynkynriah ïa ka jaka treikam jong ki shipai Assam Rifles bad ka jingpyntreikam halor ki kam ba bat da ka sorkar Mizoram.
Dang shen, ki la don palat 200 ngut ki poiwir kiba la phet na ka jingïakynad jaidbynriew ha ki thaiñ Chittagong Hill Tracts ha kaba kine ki la pyrshang ban rung sha India lyngba ki bynta khappud jong ka jylla Mizoram kaba la long ha ka 16 tarik, Ïaïong mynta u snem, hynrei kine ki la shah pynphai biang sha ka jaka ba ki wan ha ki shipai ïada khappud.
Ki la don kumba katto katne ki poiwir, kiba kynthup ïa ki khynnah bad ki ‘riewtymmen, ki la kempang hadien ba ki la ïaid lynti lyngba ki khlaw bad kine baroh ki la ïoh jingsumar lyngba ka jingïarap jong ki shipai ka tnat BSF. Wat lada ka jylla Mizoram ka la pdiang sngewbha ïa ki poiwir na Myanmar, ka jylla ka dang sngap jar ha kaba ïadei bad ka jingthmu ban pynbor ïa ki poiwir na Bangladesh ba kin leit phai. Ka sorkar kaba bat ïa ka jingsynshar, ka Zoram People’s Movement, ka la shah kynthoh shibun na ka seng kaba la bat ïa ka jingsynshar bahashwa ka Mizo National Front (MNF), namar ka jingsngap jar jong ka.
