Itanagar, Naitung:
Ki la don shibun ki jingkylla ha kaba ïadei bad ki jinglong jingman jong ki jaka ha kiba bun ki distrik ha Arunachal Pradesh na ka jingktah jur jong ki jing-twa khyndew kiba la wanrah da ka jingjur jong u slap, la ïathuh ki heh ba dei khmih hynnin ka sngi.
Ka tnat ba peit halor ki jingthombor jong ki bor ka mariang hapoh ka jylla ka la pynthikna ba ki jingtwa khyndew kiba la jia ha Shi-Yomi ki la shim ïa ka jingim jong uwei u briew ha ka Sngi Thohdieng, ha kaba da kane ka jingdon jong u, baroh kiba la ïap na kum kine ki jingjia ka la kiew sha ki saw ngut ha ki jingjia kiba la ïai jia naduh u bnai, Ïaïong.
Ki surok ba kham bun ki kali ba ïaid kiba kynthup ïa ka surok Tezu-Hayuliang kaba don ha ka thaiñ Mompani ha Lohit bad ha Anjaw distrik bad kumjuh ki surok Dari-Chambang bad Palin-Taraklengdi ha Kra Daadi kaba dei ïaid lyngba ka shnong Langdang ki dang shah khang lynti namar ba jur ka jingtwa khyndew.
Ka surok NH 513 ruh ka la ïohmad ïa ki jingeh na ka jingshah khang lynti ha Geying kaba don ha East Siang distrik, la ïathuh ka tyllong khubor.
Kumba la sakhi, la ong ba naduh u bnai, Ïaïong, ki la don palat 72,900 ngut ki briew ha kylleng ki 257 tylli ki shnong kiba la shah ktah na ka jingshlei um bad ki jingtwa khyndew ha ka jylla.
Ki bor ka mariang ki la wanrah ïa ki jingjulor ba bun jong ki jingtei, kiba kynhtup ïa 160 tylli ki surok, 76 tylli ki Power Line, 30 tylli ki nar pynïeng sainar ilektrik, lai tylli ki Transformer, khyndai tylli ki jingkieng, 11 tylli ki nala ne ki jaka pynïaid um bad 147 tylli ki jaka pynpoi um sha kylleng ki jaka.
Nalor kane, ki la don ruh kumba 627 tylli ki ïing trep, 51 tylli ki ïing heh bad 155 tylli ki ïing rit kiba la shah pynjulor na ka jingthombor ki bor ka mariang.
Na kine ki jingthombor jong ki bor ka mariang, la sakhi ba ka Itanagar, ka la ïakynduh jingeh bha ha kaba ïadei bad ka jingbym ïoh um namar ka jingjulor jong ki Pipeline.
Ha kaba ïadei bad kane ka bynta, ki heh ba dei khmih ki la pyrshang kham kloi katba lah ban pynbha pat ïa ki, wat haba la khmih lynti ba kane kan shim por da bun bun sngi ban lah ban pyndep ha ka jingpyntreikam.
