Shillong, Naitung 08
Hadien ba ka kynhun ïalehkai jong ka East Khasi Hills ka la lah ban pynpaw ïa ka jingtbit da kaba ïoh rah ïa ka nam lahduh (overall team champion) ha ka State Level Inter School Athletic Meet 2024, ka shlem treikam jong u Distrist Sports Officer lem bad ka East Khasi Hills District Athletics Association ka la pynkup buroh ïa ki khynnah ïalehkai kane ka district da ki song pisa.
Ha katei ka lympung ba la pynlong da ka tnat ïalehkai ka Sorkar Jylla kaba la long naduh 22 haduh 24 tarik u Jymmang, ki khynnah ka East Khasi Hills ki la ïoh ban khur 12 tylli ki takma ksiar, 6 ki takma rupa lem bad 3 tylli ki takma rnong.
Katei ka long ka jingïai ap khmih lynti ban pynurlong na ka bynta ban khur ïa ka jingjop namar kumba ka paw ka East Khasi Hills ka dei ka district kaba nyngkong eh ban ïoh la ka jong ka Synthetic Athletic Track bad ym kum kiwei ki district kiba dang hap ban ïakyrsum ha madan phlang bad kiba long khohruh khohram.
Kumta shwa ban ïashim bynta ha ka District Level Inter School Athletic Meet, na ka liang ka shlem u DSO lem bad ka EKHDAA ki la kam ba ki la pynlong ïa ka prokram ai jinghikai ha madan 2nd Ground jong ka Shillong Recreation Ground Trust bad 76 ngut ki khynnah ki la ïoh ban khur ïa ki takma ksiar bad rupa.
Napdeng kitei 76 ngut ki khynnah, tang 63 ngut kiba la shah jied ban mihkhmat ïa ka East Khasi Hills District bad ban ïoh ka jingshah hikai ha ki coach ka EKHDAA. Te kumta ka la lah ban pynpaw ïa ka jingtbit ha ka State Level bad ruh ban khur ïa katei ka nam.
