Ka jingbeiñ jingkhoh jogn ki heh ka seng Congress ïa ka sorkar ba la ïalam da ka National People’s Party (NPP) ka dei tang ka jinglong arsap namar kine ki seng saiñpyrthei ki ïatreilang ha Khasi Hills Autonomous District Council (KHADC). Kane ka la sdang ha ka por ba u Chief Executive Member (CEM), u Bah Titosstarwell Chyne, u la shah pynhiar shuki ha ki MDC ka NPP bad Congress, bad ka la pynpaw pyrthei ba ka seng kaba ïalam ïa ka Liang Pyrshah ha jylla, ka ïatreilang bad ka seng kaba ïalam ïa ka sorkar. Haduh mynta, u Bah Ronnie V Lyngdoh, MLA ka Mylliem na ka seng Congress, u dang dei u nongïalam ka Liang Pyrshah lane uta u ‘Leader of Opposition’. Kane ka shuki ka dei kaba donburom bad kaba kongsan bha ha ka synshar paidbah. Kumba ka long mynta, ka Liang Pyrshah ka don saw ngut ki MLA ka Congress, san na ka Trinamool Congress bad saw ngut na ka Voice of the People Party (VPP). Ka dei kamram jong u nongïalam ba un lum un lang ïa kine ki seng bad ki MLA khnang ban pynkhlaiñ ïa ka Liang Pyrshah khamtam haba ka sorkar ka long kaba khlaiñ bad ba bun paid bha.
Lehse, ki nongïalam ka seng Congress haba ki beiñ ki kynthoh ïa ka sorkar jylla ne ïa ka NPP ki klet ba ki don lang ha kajuh ka kynhun ha KHADC. Ka jingïatreilang hapdeng ka Congress bad ka NPP ka pyni shai ïa ka jingïaieid bad jingïadei kaba jan hapdeng ki nongïalam ka seng Congress bad ka NPP kam pher wat lada ka NPP ka dei ka dkhot jong ka National Democratic Alliance (NDA) ba la ïalam da ka BJP ha New Delhi katba ka Congress ka ïalam ïa ka kynhun synrop INDIA Bloc. Ka saiñpyrthei ha kane ka jylla, kumba la kdew haneng, ka pher na kiwei pat bad kaba pynsah ha ka lyngngoh ïa kiba bun ba lang. Stad katba phi stad ruh, hynrei hakhmat ka rukom leh saiñpyrthei ha Meghalaya, phim pat long eiei! Ka long ruh kaba sngewthamula shikatdei ba katba ka seng Congress ha ri thor ka ïakhun tyngeh pyrshah ïa ka BJP bad ïa ki seng kiba ïasnohkti lang bad ka, hangne ha Meghalaya pat ka long da khongpong. Lehse wat ki heh ka All India Congress Committee (AICC) ruh ki la dum lut ka buit ka stad. “Bad ki nongïalam na Meghalaya te ym lah ban leh eiei” ki lah ban long ki kyntien na ki heh ka AICC!
Ka Congress kam lah ban rai ban weng noh na ka Executive Committee ba la ïalam da ka NPP ha KHADC namar lehse kito kiba don ha KHADC kim kwah ba kan urlong kumta. Hynrei ngi lyngngoh pat ba kumno ki nongïalam ka Congress na Delhi ki ailad ïa kiba kum kine ki briew ba kin ïalam ïa ka seng ha Meghalaya? Hato u President ka Congress, u Mallikarjun Kharge, lem bad kiwei pat ki nongïalam kim don jingtip ïa kane ba ha Assembly, ka Congress ka shong ha ka liang pyrshah katba ha KHADC, ka don lang ha ka liang synshar? Kumno kita ki heh AICC kim leh eiei pyrshah ïa ki MLA, MDC bad kiwei pat ki nongïalam ka Congress kiba la leit ban ïatreilang bad ka NPP kaba don ha ka lama jong ka NDA? Kumno ka Congress kan khmih lynti ba kan khie khlieh khamtam ha Rilum Khasi Jaiñtia haba ka don ïa ki nongïalam kiba shiliang ka kjat ka don sha ka Congress bad shiliang sha kawei pat ka seng?
Ngi la ïohi ba kumno ki paidbah ki la pynrem kput ïa u Bah Vincent H Pala uba dei ruh u President ka Meghalaya Pradesh Congress Committee (MPCC) ha kane ka ilekshon MP Lok Sabha watla u la long MP la lai sien kynthih. Hynrei imat ka Congress kam pat thngad wat lada u paidbah u la ai da ka jingsneng kaba jah burom tam ïa u Bah Pala bad ïa ka seng baroh kawei. Ban rem kput haduh katto-katto hakhmat ka seng bad u kyrtong ba dang thymmai ka long shisha ka jinglehraiñ. Ki paidbah kim dei ki biej ba kim tip ba ka Congress ka ïatreilang bad ka NPP ha KHADC. Lada pynksan sa katno-katno ruh, ym lah ban da rapjot ïa ka jingrhah ban don ha ka liang synshar khamtam hashwa ka ilekshon bathymmai ban jied ïa ki MDC.
Namarkata, ki paidbah kim dei ban ngop ha ki jingleh mynleh bad jingleh arsap ka seng Congress bad khamtam eh ki nongïalam jong ka. Ki dei ban sngewthuh ba kane ka seng ka shu pynbiej kai tang namar ba ka kwah ban wanphai sha ka bor. Nalorkata, ngin hap ban peitkai aiu ki heh Congress na Delhi kin leh pyrshah ïa ki nongïalam ka seng ha Meghalaya kiba khlem don shuh ka raiñ ka rem ban ïatreilang bad ka seng kaba synrop bad ka BJP hapoh ka lama jong ka NDA. Lada kim leh eiei, ki paidbah kin sa pynbiang da ka jubab ha ka ilekshon MDC khamtam ha KHADC.
