Sydney, Naitung:
Ki bor pyniaid jong ka Australia, ki la kem bad pynngat kyndon ïa uwei u rangbah na ka nongbah Sydney hadien ka jingpyrshang jong u ban khanglad ïa ki nongpyllait im, ban pynim ïa la ka jong ka longïing ha ka jingpluh ïing kaba “shyrkhei” kaba la shim ruh ia ka jingim jong ar ngut ki khynnah shynrang bad kawei ka khunlung kynthei.
Ki pulit jong ka New South Wales, ki la iathuh ba ki thylliej ding ba shyrkhei ki la bam duh ia katei ka iing kaba don ha Lalor Park sha ka phang Sepngi jong ka Sydney ha ka step phyrngab jong ka Sngi U Blei, katba utei u rangbah 28 snem ka rta, ka paralok kynthei bad hynriew ngut ki khun ki don hapoh jong katei ka iing.
Kitei ki lai ngut ki khynnah kiba kynthup ia ar ngut ki khynnah shynrang kiba dang 3 bad 6 snem bad kawei pat ka khunlung kynthei kaba dang shi bnai, la ong ba ki la duh ei noh ia la ka jingim ha katei ka jingjia ba sniewbok ha katei ka step.
Katba kiwei pat ki saw ngut kiba naduh 4 snem haduh 11 snem ka rta bad ka kmie jong ki, kaba 29 snem ka rta, ki dang don hapoh ka jingsumar hadien ba la pynkit noh ia ki mar-mar sha ka hospital kaba don ha katei hi ka nongbah namar ki jingmynsaw jur ha katei ka jingpluh.
U heh ka New South Wales, u Chris Minns ha ka Sngi Nyngkong haba ai jingkren sha ki nognthoh khubor, u la ong ba kitei ki khynnah ki dei hok ban ioh ia ka iing kaba don jingieit bad kaba don ka jingsuk bad jingshngain.
U Myntri Rangbahduh ka ri, u Anthony Albanese, u la batai ïa ka jingshah thombor ha ïing ha sem ha Australia, kum ka “jingeh ha ka ri” hadien ka jingkiew jong ka jingïap jong ki kynthei ha ka jingshah thombor ha une u snem ka la jur ha katei ka ri.
Hynrei kaba sngew lynngoh ka long ba ki pulit ki iathuh ba utei u rangbah uba 28 snem ka rta bad uba long u kpa jong katei ka iing, u la khang pynban ia ki pulit bad ki kynhun iarap ban leit rung bad pyllait im ia kitei kiba don hapoh jong ka iing ha katei ka jingjia.
Kumta, ki pulit ki la suba ba dei utei u rangbah uba wanrah hi dalade ia katei ka jingjia khnang ba un ioh ban shim ia ka jingim jongki baroh shi iing bad ka jingtohkit kan dang iaid shakhmat ynda utei u rangbah u la koit na ki jingmynsaw kiba u dang shah sumar ha kane ka por.
