Shillong, Naitung 08
U nongïalam ka BJP u George Kurian uba dei ruh u Myntri Khynnah jong ka Sorkar NDA 3.0 kaba ïalam da u u Narendra Modi kum Myntri Rangbahduh, u la jnang ban jubab halor ka jingbym leit jngoh u Myntri Rangbahduh ka ri ïa ka jylla Manipur wat haba ka jingïakynad bad umsnam ka dang bteng haduh kine ki sngi.
U Kurian u la shem jingeh ban jubab haba ki nongthoh khubor ki buh jingkylli ïa u ha ka Lah Sngi U Blei halor ka jingshah ktah ka BJP ha ka ilekshon Lok Sabha ha ka Thaiñ Shatei Lam Mihngi bad ka jingjia ha Manipur.
U Kurian uba la wan sha Shillong kum u Myntri Sorkar, u la leit ruh sha shlem treikam ka BJP ha kaba la donlang u Myntri ka Sorkar Jylla u Bah AL Hek uba peit ïa ka tnat ri mrad nalor u MLA ka BJP u Bah Sanbor Shullai, u President ka BJP u Rikman Momin bad kiwei kiwei ki nongïalam.
U Kurian u la ong ba u Modi u la dep batai ha Parliament ha kaba ïadei ka jingjia ha Manipur bad ma u um kwah shuh ban ong ei ei. Haba ki nongthoh khubor ki la bteng ban buh jingkylli kaei ka daw ba u Modi um treh ban leit sha Manipur, une u nongïalam ka BJP um jubab shuh bad u la ong pynban ïa ki nongthoh khubor ban kylli shuh shuh ki jingkylli halor kane ka mat. Haba u nongthoh khubor u la kylli biang namar khlem ïoh ka jubab kaba shai, une u Myntri pat u la ong, hato kylli shuh ka jingkylli.
Ka jingkylli ki nongthoh khubor ka dei ruh namarba u nongïalam ka Liang Pyrshah ha Lok Sabha, u Rahul Gandhi u la leit jngoh ïa Jiribam ha Manipur ha ka Lah Sngi U Blei kawei na ki district kaba dang don hapdeng ka jingïakynad jaitbynriew bad shahktah bha.
