Shillong, Naitung 08
Ka Shongknor jong ka National Commission for Women (NCW), ka Rekha Sharma ha ka Lah Sngi U Blei ka la ong ba kan sa pynlong da ka jingwad jingtip halor ka jingdon jong ki longkmie kiba kyrshan hi dalade ïalade (Single Mother) hapoh ka Jylla.
Haba kren sha ki lad pathai khubor halor ka mat ba ïadei bad ki longkmie kiba kyrshan hi dalade ïalade, ka Sharma ka la ong, “Lada dei namar ka mon ba ki jied hi, nga sngew ba ym donkam ban tuklar, hynrei lada jia na kiwei pat ki daw ne shah batbor ne shah pynbor hangno-hangno, kata pat ka pher…hangta ngi lah ban tuklar bad ïarap ïa ka.”
Ha kajuh ka por, ka la ban biang ba lada jia ba ki kynthei ki kylla long marwei da ka mon ba ki jied hi, kata ha kawei ka liang ka dei ka hok jong ki.
La ka NCW kan pynlong ne em ïa ka jingwad jingtip halor ka jingdon kiba kum kitei ki longkmie ha ka Jylla, ka Chairperson ka la ong, “Ha Meghalaya, lada phi ai jingmut ba ki bun kiba kylla long kumtei (Single Mother) da kaba shah pynbor, nga kmen ban leh eiei halor kane bad ban phah wad jingtip. Ngan ong ïa ka dkhot jong ngi, Kong Delina Khongdup ban leh ka jingwad jingtip bad ngin peit ha kano ka rukom ngi lah ban ïarap ïa ki.”
Halor ka aiñ thymmai, ka la ong, “Hooid ka long ka jingmyntoi ïa ki kynthei, shu buh u briew u kular ban shongkurim bad u ïahap bad ka, hynrei hadien um ïashong bad ka, u lah ban shah pynshitom.”
Haba kdew ba ha ka aiñ IT bathymmai, ka la ong ba lada ki briew ki beiñ ïa ki kynthei lyngba ka rynsan ‘Online’, ki lah ban shah pynngat mukotduma ha ki pulit namar ki kam be-aiñ jong ki.
“Te ki bun ki kyndon ha ka aiñ thymmai kiba myntoi bad ïarap ïa ki kynthei,” ka la ong.
Haba kylli halor ka jingdon ki kynthei kiba pyndonkam drok hapoh ka Jylla, ka Sharma ka la ong, “Phi i teng-teng ka dei ka kamram jong ka Sorkar bad hateng-hateng ka dei ka kamram ka imlang-sahlang…ka imlang-sahlang ka leh aïu, hato phi pynlong prokram ban tehlakam ïa u drok.”
“Balei kim sngewthuh ba ki pynjot ïa ki pateng. Kaei kaba ki briew ki pyrkhat mynta ka long tang kumno ba shna pisa bad namarkata ngi ong ba ka imlang-sahlang ka la hiar dor, kim shim ka jingkitkhlieh ha lade hynrei ki bynshet baroh ha ka Sorkar ne ki kynhun. Ki klet noh la ka kamram shimet.”
Shuh shuh ka la bynrap ba ka por ka la dei ba ki ‘riew shimet kin ïeng bad tynrong lem ïa ka jingkitkhlieh ym tang ban tehlakam ïa u drok hynrei ïa ki kam thombor pyrshah ki kynthei.
