Shillong, Naitung 09
U Organising Secretary ka Voice of the People Party (VPP) East Jaiñtia Hills District, Bah Damewanhi Rymbai u la pynpaw ka jingsngewlyngngoh balei u Chief Executive Member ka Jaiñtia Hills Autonomous District Council (JHADC) Bah Thombor Shiwat u buhrieh ïa ka pisa `20 klur kaba dei ka bhah kaba la dep phah da ka Sorkar Jylla.
U Bah Rymbai u la ong ba ïa kane ka pisa `20 klur ki nongïalam ka VPP ki tip hadien ba ki la mih na kamra jong u CEM ka JHADC ha ka Lah Sngi U Blei hadien ba ki la leit ïakynduh ïa ki katto-katne ki ophisar.
U la ong ba u CEM u dei ban pynshai la kane ka pisa kin siew ïa ka tulop jong ki nongtrei ne ki mut ban pyndonkam shaei khnang ba ki paidbah kin tip.
Ha kawei ka liang u la ai khublei ïa ka sorkar jylla kaba la lah ban pyllait ïa ka pisa kaba `50 klur sha ka JHADC hynrei u CEM u dei ban pynthikna ban siew beit ïa ka tulop sha ki nongtrei kumba u la dep kular.
U la pyntip ba ki nongtrei ka JHADC ki duh tulop mynta la khadwei bnai hynrei na kane ka pisa la kular ban siew shwa saw bnai bad mynta la dep pyllait ïa ka tulop tang ar bnai.
Shuh shuh u la pyntip ba kane ka `50 klur kam pat lah ban pyndap ïa ka tulop jong ki nongtrei.
