Shillong, Naitung:
Ka Employment Monitoring Cell jong ka Khasi Students’ Union (KSU) Sengkmie ha ka Lah Sngi U Blei ka la leit ban ïakynduh ïa u Dean jong ka College of Post Graduate Studies in Agriculture Sciences (PGSAS), Umïam ban pan jingpynshai halor ka jingpyllait kam jong ka post Library Assistant.
Ha ka kyrwoh khubor ba la pyllait, ka KSU ka la ong ba katkum ka jingpynbna (advertisement) ba la pyllait ha ka 30.10.2023, la don ar tylli ki post ba lait na ka bynta ka kam Library Assistant, kawei na ka bynta ka ‘unreserved category’ bad kawei na ka bynta ka ‘ST category’ ha kaba la shem ba na ki 23 ngut ki kyrtong ba la dep jied ym shym la don ki kyrteng jong ki samla na ka rilum Khasi-Jaiñtia wat la ki la aplai ïa katei ka kam.
Ha kaba ïadei bad kane, na ka liang jong u Dean katei ka kolej u la pynshai ba ki khynnah Khasi kiba aplai ïa katei ka kam, kim shym don ïa ka Bachelor Degree, hynrei ki la pyndep ïa ka Bachelor Degree ka jong ki na kiwei pat ki jingpule bad ki leh ïa ka Master ka jong ki ha ka Library & Information Science. U la ong ruh katkum ka ordinance jong ka Central Agricultural University ba la pyllait ha ka 18.10.2023, ki nongthep kam na ka bynta ka Library Assistant ki dei ban pyndep ïa ka Bachelor Degree ha Library & Information Science.
Kumta ka KSU ka la pynsngew sha u Dean ba ha ka jylla Meghalaya, ym pat don ka Bachelor Degree na bynta ka Library & Information Science, bad kane ka dei kawei na ki daw ba ki samla ka jylla kim shym la ïoh ka lad ban pyndep ïa kane ka jingpule.
Ka seng ka la dawa ba dei ban pynsangeh shwa shipor ïa ka jingthep kam na ka bynta ka Library Assistant katba kam pat ïoh lad ban mudui ban pynkylla ïa kane ka ordinance ban ailad ïa ki samla Khasi ban ïoh thep kam ha kaba ïadei bad kane ka bynta.
