Naushahro Feroze, Naitung:
Ha kawei ka jingjia kaba sngew shyrkhei, la ong ba uwei u rangbah u la shah kem noh namar ka jingshlur jong u ban tep im wat ia la ka jong ka khun kaba dang 15 sngi bad kane ka la jia ha Tharushah hapoh Pakistan, la iathuh katkum ba la ioh jingtip da ki lad pathai khubor ka ARY.
Ki heh pulit ka Pakistan ki la pyntip ba une u rangbah ba la ithuh kum u Tayyab, u la phla halor katei ka kam pyniap briew hadien ba la tohkit bniah da ki pulit. Une u rangbah u la phla ba ka daw kaba pynlong ia u ban leh kumtei ka dei namar ba um sngew kot bor shuh ban phah sumar ia la ka jong ka khun bad kumta u la rai ban shu pyniap noh ia ka khnang ba un lait ka lut-ksan hadien- habud. U Tayyab u la phla ruh ba shuwa ba un tep im ia ka khunlung, u la thep hapoh ka byrni bad hadien kata u la tep shapoh khyndew.
Ki pulit ki la mudui da ka mukotduma pyrshah ia utei u rangbah uba shlur ban shim ia ka mynsiem briew ha ka kti lajong khlem da pyrkhat jngai ne don ka mynsiem sngewlem ia itei i khyllung iba dang shu wan poi dang 15 sngi sha kane ka sla pyrthei.
Kumta, la ong ba ka iingbishar ruh ka la ai bor ia ka tnat ba dei khmih ban leit sei biang ia itei i khunlung khnang ba yn ioh ban leh ia ka post-mortem bad ban lap la ka dei shisha ne em kumba la phla da utei u kpa ba itei i khyllung i dei i ba don jingshitom haduh ba um lah shuh ban phah sumar namar u iathuh ba ka jingshitom ba katei ka khunlung ka don ruh ka long kaba bam pisa.
Ha kawei pat ka jingjia kaba la jia hapoh ka thaiñ Defence B jong ka distrik Lahore hapoh Pakistan hi, la ong ba uwei u rangbah bad kawei ka briew ki la shah kem namar ka jingpynshitom be-aiñ ia kawei ka nongtrei ha iing kaba dang 13 snem ka rta.
Hadien ba la leit ban ujor da ka kmie jong katei ka khynnah, la ong ba ki bor ka aiñ ki la ujor shuwa nyngkong da ka First Information Report (FIR) pyrshah ia utei u rangbah uba la ithuh kum u Hassam. Hadien kata, la bat noh ia u Hassam naka bynta ki jingtohkit kiba bniah halor katei ka jingjia bad ka tnat tohkit ka dang wad bniah ruh ban lap la katei ka kurim jong u, ka iadon kti lang ne em ha katei ka jingleh pynkheiñ aiñ jong katei ka iing da kaba pynshitom beiñ ia katei ka nongtrei iing.
Katkum katei ka ejahar, la ong ba katei ka khynnah 13 snem ka la shah shoh pynmynsaw bad shah pynlaw lyngkhuit syndon hadien ba katei ka iing ka kynnoh ba ka tuh ia ki jingdon- jingem na katei ka iing. Hynrei, na ka liang jong ka kmie katei ka khynnah, ka la kyntait ia kitei ki jingkynnoh bad ka la iathuh ba katei ka khynnah ka la mynsaw ha ki bynta jong ka kti bad dur khmat namar ka jingpynshitom beiñ jong kitei ki shijur.
U heh pulit ka Lahore u la kular ba lada kadei kumba la ujor da ka kmie jong katei ka khynnah, utei u rangbah un shah pynshitom Katkum ki kyndon pynkheiñ aiñ ba la buh jong ka ri.
