Tura, Naitung 09
U nongtrei mon sngewbha na South Garo Hills, u Greneth M. Sangma u la ujor sha u Superintendent of Police (SP) halor ki jingkynnoh bym biang haba ïadei bad ka jingpyntreikam ïa kawei ka projek JJM ha ka shnong Rompa Asim, ha kajuh ka por, u la kyntu ïa ka tnad ba dei khmih ban shimkhia halor katei ka kam bad leh ïa kaba donkam.
Katkum ka jingong u Greneth, ïa ka projek ym shym la pyntreikam katkum ki kyndon ka JJM bad ka jingbym biang ha ka ban pynbiang ïa ki ‘pipe’, ha kawei ka liang ka la ïalam sha ka jingbym biang ka umbam-umdih ha kiba bun ki longïing. Wat la ka thong jong ka JJM ka long ban pynbiang ïa ka umbam-umdih kaba khuid ba suba sha baroh, u la kam ba ïa katei ka projek ym shym la kner sha man la ki longïing hapoh ka shnong.
U Greneth u la kam ruh ba la pynïeng ïa 2 tylli ki ‘Signboard’ ban pyni ïa 2 tylli ki projek, hynrei haba ïadei bad kane, la pyntreikam tang ïa kawei ka projek. U la ong ba ka projek ka kynthup ïa 2 tylli ki shnong – Darit Asim bad Balkal Asim, hynrei ki nongshong shnong kim don jingtip shaphang ki jingmyntoi jong ka projek.
Katkum ka jingong u Greneth, ki la don ruh ki jingujor na ki nongshong shnong halor ka jingkynnoh ba ka la don ka jingsei ïa ka pisa jong ka projek khlem da pyntrei ïa kano-kano ka kam. Ïa ki thup kaiphod jong ka projek la soi da u Nokma bad la thaw ïa ka komiti khlem ka jingmynjur jong ki nongshong shnong.
Haba kynnoh ba ka la don ruh ka jingleh thok haba ïadei bad ki jingsoi bad ki kot ki sla, u Greneth u la kyntu ïa ka tnad ban ujor mukotduma lada hadien ka jingtohkit, la lap ba ki jingkynnoh ki long kiba shisha.
