Shillong, Naitung 09
Ka All Khasi Meghalaya Tourist Taxi Association (AKMTTA) ha ka Sngi Ba-ar ka la dawa na ka Sorkar ban khang noh ïa ki kali kamai tourist kiba dei nabar ka Meghalaya ban leit sha ki jaka jngohkai kiba don ha ka Jylla, bad kane ka kynhun ka la kren shai ruh ba kim khang ïa kino-kino ki kali kamai tourist na shabar ban kyntiew ïa ki nongleit-nongwan na Shillong katkum ka por ba la pynbeit.
Ki nongïalam ka AKMTTA hapoh ka jingïalam u President u Bah Ricaldinus Dohling, ha kane ka sngi ki la leit ban ïakynduh ïa u Myntri ka tnat Jngohkai u Bah Paul Lyngdoh ban pynsngew halor kane jingeh bad ban aiti ruh ïa ka dorkhas.
Ha ka dorkhas sha u Myntri, ka Synjuk ka la pyni ruh ïa ka jinglong jingman katkum ka jingwad bniah kaba la leh da ka seng bad ka la pynpaw ba na ki 5120 tylli ki kali kiba la pynrung kyrteng ha Meghalaya, ki don kumba 4014 tylli kiba kamai, kim shym la ïoh ïa ki nongleit jingleit (Passenger) man la ka sngi bad ki la mad ïa ka jingduhnong kaba khraw.
Ha kane ka jingïakynduh ïa u Myntri, ka Synjuk ka la kyntu ïa ka Sorkar ban kan thaw noh da ka kpait saiñ kam (policy) ban nym shah ïa kiwei ki kali na shabar ban ïalam kai ïa ki ‘riew shang pyrthei sha ki jaka jngohkai kiba don ha ka Jylla. Halor kane ki nongïalam ka synjuk ki la ïathuh ba na ka liang u Myntri u la pan por ar taïew ban pynbeit hapoh ka tnat bad hadien kata kan don biang ka jingïakren bad ka synjuk.
U Bah Dohling u la ïathuh ba kumba ka long mynta ha ka shisngi ki kali kiba wan na shabar ki don hapoh ar hajar tylli kiba ïoh ban kamai sahuh sha ki jaka jngohkai.
U la ong ba ka jingshah ktah ka la jur bha ïa ki para nongñiah kali trai jylla, bad wat kiba ïoh ïa ka skhim na ka Sorkar ki la shah ktah wat haduh ka jynjar ban siew ïa ka ram bad ban pynbiang ha ïing ha sem.
Na ka liang ka synjuk ka la ong ruh ba kan sa shong ban ïakren halor ka jingdon jong ki mynnong (agent) kiba pynbat kali lypa ïa ki nongwan jngohkai kaba pynduh kamai pat ïa ki kali jong ki trai jylla.
Haba kylli, u Bah Dohling u la ïathuh ba ki nongñiah kali kamai ML jong ka Meghalaya ki ïakynduh jingeh wat mynta ruh haba ki kamai tam, namar tang ban shu leit buh nongleit jingleit ha Airport la shah daiñ kuna haduh 2000 tyngka, katba ki kali na kiwei pat ki Jylla ki ïoh ban kamai laitlan bad ki pulit ruh kim leh eiei haba ki ïeng ha ki khap sor.
