Jowai, Naitung:
Ki nongshong shnong jong ka Nartiang da kawei ka sur ki la dawa na ka Delimitation Committee ban pynneh ïa ka Nartiang Umladang Constituency bad ym dei ban pharia ïa ka shnong Nartiang.
Ïa kane ka rai la shim ha ka jingïalang paidbah kaba long ha ka 8 tarik Naitung ha shnong Nartiang ha ka jingïadonlang u Waheh Shnong Mom Phalangki bad u Secretary Shnong Sati Suwer nalor kiwei kiwei ki riew rangbah.
Katkum ka Delimitation of JHADC Constituency draft, la phiah ïa ka shnong Nartiang ha ki ar tylli ki Constituency kata ha ka Mynsoo-Nongjngi bad Moodop-Umladang.
Ka dorbar shnong Nartiang kala pynher bun tylli ki jingthoh sha ka Delimitation Committee, ban kyrpad ban pynneh ïa ka constituency kaba mynta, hynrei ym shym la pynneh ïa kane ka constituency.
Ha kane ka juk ka sngi, ki ar tylli ki Dorbar Shnong kiba kynthup ïa ka shnong Namdong-B bad ka Mukhnang kila pynlong da ka dorbar ban ïeng pyrshah ïa ka draft jong ka Delimitation Committee ha kaba kine ki ar tylli ki Shnong ki shah pynkynriah na ka 10-Mynsngat Khanduli sha ka Shilliangmyntang.
Ha kane ka Dorbar la donlang naduh u Waheh Shnong ka Namdong-B DS War, Waheh Shnong Mukhnang Runi Mukhim, Secretary ka Namdong-B Serus Lypon, Apostol Shadap, Linus Pale, bad ki dkhot jong ki artylli ki EC Shnong kumjuh ki longkmie longkpa, ki samla ka thaiñ hi baroh kawei kiba ïa wan mih ryntih ha kane ka Dorbar ban pyrshah ïa ka jingthmu jong ka Delimitation Committee ban pynkylla ïa ka rukom long ki constituency.
Ha kane ka sngi na ka liang ka seng samla ka shnong Namdong ki la mih shakhmat ban pynsngew ïa ka jingbym ïahap ban phiah lyngkhot lyngkhai ïa ki constituency khamtam ïa ki ar tylli ki shnong kiba ym ïahap satia bad kiba ym don nongrim haei haei ruh namar ka la ïa jngai shaba palat.
Ka shnong Iongkwang ruh kala ïeng pyrshah ïa ka jingshah pynkynriah na ka 11-Shilliangmyntang-Namdong sha ka 12-Barato-Mukroh constituency namar kan wanrah jingeh ïa ki paidbah haba ki leit thep vote namar ba jngai ka Polling Station na ka shnong jong ki.
